Աֆրիկյան Սահել շրջանում «Բարհան» օպերացիայի ընթացքում ֆրանսիական զորքերը վնասազերծել են «Մեծ Սահարայում Իսլամական պետություն» (ISGS) ահաբեկչական խմբավորման մի քանի պարագլուխների: Այս մասին հայտնել է AFP-ն՝ հղում կատարելով Ֆրանսիայի պաշտպանության նախարար Ֆլորենս Փարլիին:
Խոսքը, մասնավորապես, Աբդելհաքիմ ալ-Սահրաուիի մասին է, որը, ըստ նախարարի, «ISGS-ի կարեւոր անձանցից է՝ հայտնի շարիաթի օրենքների խիստ պահպանմամբ», - հաղորդել է ՏԱՍՍ-ը:
«Հաստատվել է, որ նա մահացել է մայիսին՝ դեռեւս չբացահայտված հանգամանքներում», - գործակալությունը մեջբերել է Փարլիի խոսքերը:
Բացի այդ, հունիսին գերեվարվել էին ISGS-ի երկու պարագլուխներ՝ Սիդի Ահմեդ Ուլդ Մուհամմեդը, որը հայտնի է որպես Քաթաբ ալ-Մաուրիտանի անունով, եւ Դադի Ուլդ Չուայբը (կեղծանունը՝ Աբու Դարդար): Վերացվել են եւս վեց զինյալներ, որոնց անունները չեն ճշտվել:
2015 թվականի գարնանը ստեղծված «Մեծ Սահարայում Իսլամական պետություն» խմբավորումը «Իսլամական պետության» կառույցներից է: Այն առաջացել է Արեւմտյան Աֆրիկայում գործող արմատական իսլամիստական «Ալ-Մուրաբիտուն» խմբավորման պառակտման արդյունքում:
2014 թվականի օգոստոսին Ֆրանսիան սկսել է «Բարհան» գործողությունը՝ պայքարելու իսլամիստական խմբավորումների դեմ Մալիում, Բուրկինա Ֆասոյում, Մավրիտանիայում, Նիգերում եւ Չադում: Այն «Սերվալ» օպերացիայի շարունակությունն էր, որը ֆրանսիացի զինվորականներն իրականացրել են 2013-2014 թվականներին Մալիում: Ֆրանսիայի պաշտպանության նախարարության տվյալներով՝ այժմյան օպերացիայում ներգրավված է ավելի քան 5000 մարդ:
