Չեմ կարծում, որ ադրբեջանցիների լուրջ նահանջ կլինի, եւ չեմ տեսնում այն ուժերին, որոնք կարող են նրանց ստիպել դա անել: Այս մասին հուլիսի 12-ին TALK TIME-ի եթերում ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը՝ մեկնաբանելով Ռուսաստանի Դաշնության նախագահ Վլադիմիր Պուտինի վերջին հայտարարությունները, որոնք արվել են Հայաստանի վարչապետի պաշտոնակատար Նիկոլ Փաշինյանի հետ հանդիպման ժամանակ: Քաղաքագետի խոսքով՝ Պուտինը, առաջին հերթին, խոսում էր Հայաստանի ու Ադրբեջանի սահմանին կայունության մասին:
«Կարծում եմ՝ նա խոսում էր հաղորդակցությունների այսպես կոչված ապաշրջափակման մասին: Տեսնում եք, որ ռուսներին պետք է, որպեսզի մեծ պատերազմ չլինի եւ սահմանը համեմատաբար կայուն լինի: Ըստ ամենայնի, դրանք շատ արագ չեն, բայց, այնուամենայնիվ, որոշակի գործողություններ ծավալվում են այդ ուղղությամբ: Ընթանում են բանակցություններ, որոնց վերջնական արդյունքը կլինի Հայաստանի սահմանի այդ հատվածում անվտանգության խնդիրները հայկական բանակից ռուսականի վրա տեղափոխելու հնարավորությունը: Ինչ տեսքով՝ դա արդեն նշանակություն չունի: Ռուսները կարծես թե քիչ թե շատ համաձայն են դրա հետ»,- պարզաբանեց Իսկանդարյանը՝ հավելելով, որ այս դեպքում Մոսկվայի եւ Երեւանի շահերը համընկնում են: Փորձագետը կարծում է, որ այդ ծրագրերը, ամենայն հավանականությամբ, կյանքի կկոչվեն: Այնուամենայնիվ, նա նշեց, որ կա որոշակի օրակարգ, որում Հայաստանի եւ Ռուսաստանի շահերը չեն համընկնում:
«Ռուսներին չի հետաքրքրում, թե ում է պատկանում այս կամ այն քառակուսի կիլոմետրը: Ռուսներին ընդհանրապես չի հետաքրքրում, թե ով է վերահսկում Սեւ լիճը՝ լինի դա Հայաստանը, Ղարաբաղը, թե Ադրբեջանը: Նրանց այդ ամենը չի հետաքրքրում: Նրանք շահագրգռված են կայունությամբ որոշակի գծի երկայնքով, որն իրականացվելու է»,- ասաց քաղաքագետը: Ընդ որում, նա նշեց, որ եթե պաշտոնական Երեւանն ունենար ճնշում գործադրելու որոշակի ռեսուրսներ, ինչպես նաեւ՝ սահմաններն իր օգտին սահմանելու պահանջներ, ապա կարելի էր ենթադրել, որ այդ շահերը հաշվի կառնվեին: «Բայց ճիշտ հակառակն է: Ադրբեջանն ունի այդ ռեսուրսները, մինչդեռ Հայաստանն այդ ռեսուրսները չունի»,- ընդգծեց վերլուծաբանը:
