Ռուսաստանի եւ Բելառուսի նախագահներ Վլադիմիր Պուտինն ու Ալեքսանդր Լուկաշենկոն պայմանավորվել են, որ Բելառուսի համար 2022 թվականին գազի գինը չի ինդեքսավորվի եւ կպահպանվի 2021 թվականին գրանցված մակարդակին, հաղորդում է ՏԱՍՍ-ը:
«Որոշվել է, որ գազի գինը Բելառուսի համար 2022 թվականին չի ինդեքսավորվի եւ կպահպանվի 2021 թվականին գրանցված մակարդակին»,-լրագրողներին հայտնել է ՌԴ նախագահի մամուլի քարտուղար Դմիտրի Պեսկովը Սանկտ Պետերբուրգում երկու առաջնորդների բանակցությունների արդյունքում:
«Գազպրոմի» եւ «Գազպրոմ տրանսգազ Բելառուսի» միջեւ մինչեւ 2021 թվականի վերջը գործում են Բելառուսին գազի մատակարարման եւ հանրապետության տարածքով այն տեղափոխելու պայմանագրերը: Ինչպես 2020 թվականի դեկտեմբերի 29-ին հայտարարել էր Բելառուսի վարչապետ Ռոման Գոլովչենկոն, հանրապետությունը պայմանավորվել է Ռուսաստանի հետ 2021 թվականին 1 հազար խորանարդ մետր գազը 128,5 դոլարով մատակարարելու մասին: 2020 թվականին Բելառուսում գազի գինը կազմել է 127 դոլար 1 հազար խորանարդ մետրի դիմաց:
Բացի այդ, նախագահները պայմանավորվել են Բելառուսին վարկային աջակցություն ցուցաբերելու մասին Ռուսաստանում հարկային մանեւրի կապակցությամբ: «Նախագահները բավականին հանգամանալից եւ երկարատեւ զրույց են ունեցել»,-նշել է Կրեմլի ներկայացուցիչը: