ԱՄՆ-ն խորապես մտահոգված է Վրաստանի Գերագույն դատարանի վեց դատավորների՝ «իշխող կուսակցության ներկայացուցիչների եւ ընդդիմության միջեւ ապրիլի 19-ին կնքված պայմանագրի խախտմամբ» նշանակման կապակցությամբ: Այս մասին ասվում է Պետդեպարտամենտի մամուլի ծառայության ղեկավար Նեդ Փրայսի այսօր հրապարակված գրավոր հայտարարության մեջ:
«Ապրիլի 19-ին ԵՄ-ի եւ ԱՄՆ-ի միջնորդությամբ Եվրոպական խորհրդի նախագահ Շառլ Միշելի հովանու ներքո կնքված համաձայնագիրը ստորագրողներին պարտավորեցրեց կասեցնել Գերագույն դատարանում «բոլոր ներկայիս նշանակումները»՝ մինչ լայն իմաստով «հավակնոտ դատական բարեփոխումների» ընդունումը, այդ թվում՝ բազմակուսակցական բարեփոխումների գործընթացը»,- ասված է հայտարարության մեջ:
ԱՄՆ-ն Վրաստանի իշխանություններին կոչ է անում կյանքի կոչել ապրիլի 19-ի համաձայնագիրը, այդ թվում՝ կասեցնել Գերագույն դատարանի նշանակումները՝ «մինչեւ թափանցիկ եւ համապարփակ դատական բարեփոխումները»:
«Վրաստանի քաղաքական ղեկավարները, այդ թվում՝ իշխող կուսակցությունը, համաձայնել են դրան: Դա չկատարելը հետագայում կխաթարի վրացական հասարակության եւ միջազգային հանրության վստահությունը վրացական դատական համակարգի նկատմամբ եւ կվտանգի Վրաստանի ժողովրդավարական զարգացումը: Ապրիլի 19-ի համաձայնագրի թերի կատարումը կարող է թուլացնել ներդրողների վստահությունը եւ նվազեցնել Վրաստանի քաղաքական եւ սոցիալական ինստիտուտների կայունությունը»,- ասված է հայտարարության մեջ:
Պետդեպարտամենտը նաեւ կոչ է անում Վրաստանի իշխանություններին «վերականգնել ժողովրդավարական սկզբունքների եւ օրենքի գերակայության պահպանումը՝ միաժամանակ ամրապնդելով դրանց գործընկերությունն ԱՄՆ-ի եւ միջազգային հանրության հետ»:
Ինչպես հիշեցնում է «Նովոստի-Գրուզիա»-ն, հուլիսի 12-ին երկրի խորհրդարանը Գերագույն դատարանի վեց դատավոր նշանակեց՝ չնայած ընդդիմության հասցեին աննախադեպ քննադատությանը, ինչպես նաեւ՝ տեղական հասարակական կազմակերպությունների և միջազգային գործընկերների լուրջ դիտողություններին:
ԵԱՀԿ Ժողովրդավարական հաստատությունների եւ մարդու իրավունքների գրասենյակը (ԵԱՀԿ /ԺՀՄԻԳ) կարծում է, որ թեկնածուների առաջադրման գործընթացն անցել է դատական համակարգի անկախության նկատմամբ հասարակության անվստահության մթնոլորտում, եւ նրանց հաստատումը չի համապատասխանել ապրիլի 19 համաձայնագրի դրույթներին: Վրաստանում ԱՄՆ դեսպան Քելի Դեգնանը բազմիցս արտահայտել է նման ոգով:
Թե՛ Վրաստանի հանրային պաշտպան Նինո Լոմջարիան, թե՛ «Անկախ եւ թափանցիկ արդարության» կոալիցիան, որում ընդգրկված է մինչեւ 40 հասարակական կազմակերպություն, հրաժարվել են մասնակցել խորհրդարանում Գերագույն դատարանի դատավորների թեկնածուների ընտրության հատուկ խմբի աշխատանքներին:
Հուլիսի 12-ին Վրաստանի խորհրդարանում դատավորների նշանակումը տեղի ունեցավ լուրջ լարվածության, աղմուկի եւ ֆիզիկական առճակատման ֆոնին: Ընդդիմությունն ու քաղաքացիական ակտիվիստները պահանջում էին վարչապետ Իրակլի Գարիբաշվիլիի եւ նրա կառավարության հրաժարականը «Պիրվելի» հեռուստաընկերության օպերատոր Ալեքսանդր Լաշկարավի մահից հետո:
Իշխանությունների ընդդիմախոսները կարծում են, որ վերջին նշանակումներն ավելի կամրապնդեն «կլանը»՝ դատավորների ազդեցիկ խումբը, որն իշխանություն է ձեռք բերել երկրի գրեթե ամբողջ դատական համակարգի նկատմամբ արդարադատության բարձրագույն խորհրդի կազմում 2013 թվականին ընտրվելուց հետո: Ավելին, նրանք շեշտում են, որ թեկնածուների հաստատումը դատական համակարգի միանձնյա կառավարման համատեքստում անընդունելի է: