44-օրյա պատերազմի հանգամանքներն ուսումնասիրող քննիչ հանձնաժողովի ստեղծումը մենք համարում ենք անհրաժեշտ: Այս մասին TV5-ին տված հարցազրույցում նշեց ՀՅԴ ԳՄ ներկայացուցիչ, «Հայաստան» դաշինքից պատգամավոր ընտրված Իշխան Սաղաթելյանը:
«ՔՊ-ն փորձեց առաջ ընկնել՝ դա ներկայացնելով իրենց նախաձեռնությունը, բայց պետք է շատ հստակ արձնագրենք, որ եթե այս հանձնաժողովը ստեղծվելու է իշխանության կողմից, հանձնաժողովի նախագահը լինելու է իշխանության ներկայացուցիչը, այդ հանձնաժողովը չի կարող բազմակողմանի, ինքնուրույն քննել այն խնդիրները, որ դրված են լինելու իր առջեւ:
Սրանով իշխանությունները փորձելու են նշանակել մեղավորներ, որ արդեն նշանակել են, եւ այս ամողջ պատերազմի հետեւանքները բարդել մի քանի հոգու վրա, իսկ իրենք փորձեն այս ամենից չոր դուրս գալ: Փորձելու են պատասխանատվությունը տանել ինչ-որ անձանց վրա»,-ասաց Սաղաթելյանը:
Նա համոզմունք հայտնեց, որ այս իրավիճակում այդ հանձնաժողովը չի կարող լինել անկախ և ինքնուրույն. «Եթե իրենք անկեղծ են իրենց հայտարարած նպատակների մեջ, պետք է այդ հանձնաժողովի նախագահը լինի ընդիմությունից: Պետք է լինի ճիշտ ձեւաչափ, արդյունավետ քննություն: Նախ, իրենց հայտարարծ արտախորհրդարանական ուժերը ոչ թե արտախորհրդարանական ընդդիմություն են, այլ ընդդիմություն են ընդդիմությանը, այսինքն ընդդիմություն են մեզ: Եթե փորձեն այդ ուժերին բերել հանձնաժողով եւ ընդդիմությունն այդտեղ չունենա վճռորոշ մասնակցություն, մենք այս ամենը համարում ենք հերթական շոուն, որին չենք կարող մաս դառնալ: Եթե հասկանանք, որ այդ ձեւաչափը չի համապատասխանում մեր ասած պահանջներին, անիմաստ ենք համարում այս ամենը»,-ասաց ՀՅԴ-ական գործիչը:
Նա հավելեց, որ «Հայաստան» դաշինքն այս հարցով հանդես կգա հայտարարությամբ, սակայն իրենց տրամադրություններն այդպիսին են:
