Ոչ ես, ոչ ամուսինս անձնական թշնամիներ չունենք, կատարվածը, միանշանակ, դիտավորություն է, կապված իմ քաղաքական դիրքորոշման հետ։ Այս մասին այսօր՝ օգոստոսի 5-ին, NEWS.am-ի հետ զրույցում ասաց «Երկիր Ծիրանի» կուսակցության ղեկավար, փաստաբան Զարուհի Փոստանջյանը։
«Ես կատարված պատահականություն չեմ համարում։ Դեպքը տեղի ունեցել գիշերը ժամը երեքից հետ։ Այնպիսի ժամ են ընտրել, որ մարդիկ քնած լինեն, չտուժեն, այսինքն՝ ինչ-որ բանի զգուշացում է եղել»,- նշեց նա։
Զարուհի Փոստանջյանի խոսքով՝ ուշ գիշերին իրենց հարևաններ են հեռախոսազանգով տեղեկացրել, որ մեքենան հրդեհվում է։
«Այս պահին կոնկրետ պարզ չէ՝ պայթուցիկ են տեղադրել մեքենայի տակ, թե՝ ոչ։ Բայց հարևաններն ասացին, որ պայթյունի ձայն են լսել»,- ասաց Զարուհի Փոստանջյանը։
Փոստանջյանը տեղեկացրեց, որ հաղորդում է ներկայացրել ոստիկանություն։ Դեպքի վայր ժամանած ոստիկանները զննություն են իրականացրել, նշումներ վերցրել և զրուցել իր ամուսնու հետ։ Նաև առգրավել են դեպքի վայրին կից տեսախցիկները։