2001 թվականի սեպտեմբերի 11-ի ահաբեկչությունների զոհերի հարազատները դեմ են արտահայտվել ԱՄՆ նախագահ Ջո Բայդենի մասնակցությանն այս տարվա միջոցառումներին, եթե նա չկատարի ողբերգության հանգամանքների վերաբերյալ իր տրամադրության տակ հայտնված որոշ պետական փաստաթղթերի գաղտնազերծման մասին իր խոստումը, փոխանցում է «ՌԻԱ Նովոստի»-ն:
Մոտ 1.8 հազար մարդուց բաղկացած խումբը, այդ թվում՝ զոհերի հարազատները, շտապ օգնության աշխատակիցներն ու ահաբեկչությունը վերապրածները, նախագահին կոչ են անում չմասնակցել ողբերգության 20-րդ տարելիցի կապակցությամբ Նյու Յորքում եւ Շենքսվիլում (Փենսիլվանիա) նախատեսված հիշատակի միջոցառումներին: Կոչի հեղինակները ցանկանում են, որպեսզի նախագահը նախ հրապարակի այն փաստաթղթերը, որոնք, իրենց կարծիքով, ահաբեկչական հարձակումների հետ Սաուդյան Արաբիայի իշխանությունների կապի ապացույցներ են պարունակում: Խումբը պնդում է, որ Բայդենը դեռ նախագահի թեկնածու եղած ժամանակ խոստացել էր ողբերգության մասին հնարավորինս շատ տեղեկություններ հայտնել, սակայն դա չի արել, հայտնում է հեռուստաալիքը:
Կոչի հեղինակները կարծում են, որ 2004 թվականին հարձակումների հետաքննության հանձնաժողովի աշխատանքների ավարտից ի վեր Սաուդյան Արաբիայի մասնակցության բազմաթիվ ապացույցներ են հայտնաբերվել, սակայն ամերիկյան իշխանությունները դա գաղտնի են պահել: «Մենք չենք կարող ... ընդունել նախագահին մեր սրբավայրերում, մինչեւ նա չկատարի իր պարտավորությունը»,- NBC-ը մեջբերում է մի հատված նրա կոչից: