Նիգերի հարավ-արեւմուտքում գտնվող գյուղերից մեկի վրա հարձակման ժամանակ անհայտ անձինք 37 խաղաղ բնակչի են սպանել, հայտնում է Reuters-ը:
Հարձակումը տեղի է ունեցել Բանիբանգու կոմունայում՝ Մալիի սահմանի մոտակայքում, որտեղ այս տարի իսլամիստ գրոհայինները հարյուրավոր խաղաղ բնակիչների են սպանել:
Նիգերի Տիլաբերի եւ Թահուա շրջաններում զինված խմբավորումները 2021 թվականին ավելի քան 420 խաղաղ բնակչի սպանել են եւ տասնյակ հազարավոր մարդկանց վտարել են իրենց տներից, ասվում է Human Rights Watch իրավապաշտպան կազմակերպության զեկույցում:
Այդ գրոհները մաս են կազմում ավելի լայնածավալ հակամարտության, որն ընդգրկում է աֆրիկյան Սահելի շրջանի սահմանամերձ Մալի, Բուրկինա Ֆասո եւ Նիգեր շրջանները, որոնք «Ալ-Քաիդա»-ի եւ «Իսլամական պետության» ջիհադիստները ձգտում են իրենց վերահսկողության տակ առնել:
Վերջին տարիներին հազարավոր խաղաղ բնակիչներ են զոհվել: