Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Ստանիսլավ Զասը մտահոգություն է հայտնել, որ «Թալիբան» շարժման դեմ դիմադրության առաջացող օջախները կարող են Աֆղանստանում երկարաժամկետ քաղաքացիական պատերազմի հանգեցնել, փոխանցում է ՏԱՍՍ-ը:,
«Մտավախություն կա, որ թալիբների դիմադրության ծագող օջախները երկարաժամկետ քաղաքացիական պատերազմի զարգացման կարող են հանգեցնել՝ դժվար կանխատեսելի հետեւանքներով ոչ միայն Աֆղանստանի, այլեւ հարակից խոշոր տարածաշրջանի անվտանգության համար»,- երկուշաբթի առցանց ճեպազրույցում ասել է նա:
Զասի խոսքով, թալիբների ղեկավարության կողմից կան որոշ դրական հայտարարություններ` իրենց ներքին եւ արտաքին քաղաքականության մոտեցումների վերաբերյալ: «Միեւնույն ժամանակ, լուրջ մտահոգության տեղիք է տալիս, որ Աֆղանստանի բոլոր ազգությունների ձգտումները եւ շահերը արտացոլող կոալիցիոն կառավարության ձեւավորմանը աջակցելու թալիբների ղեկավարության ներկայացուցիչների խոստումները դեռեւս չեն անցել գործնական իրականացման փուլին»,- ընդգծել է նա:
Այս առումով, շարունակել է ՀԱՊԿ գլխավոր քարտուղարը, անհրաժեշտ է ջանքեր գործադրել «այս երկրում հետագա արյունահեղությունը կանխելու եւ երկխոսություն հաստատելու համար, որպեսզի, ի թիվս այլ բաների, կանխվի փախստականների անվերահսկելի հոսքը, կրոնական արմատականության գաղափարների քարոզչության աճը»:
Զասը ներաաֆղանական հակամարտության կողմերին կոչ է արել երկխոսություն հաստատել եւ դադարեցնել ռազմական առճակատումը Աֆղանստանի հյուսիսային նահանգներում:
«Իհարկե, մենք այս առճակատմանը վերջ տալու, ներաֆղանական երկխոսության հաստատման եւ Աֆղանստանում պետական իշխանության ձեւավորման կոչ ենք անում՝ հաշվի առնելով այնտեղ ապրող բոլոր ազգությունների եւ բոլոր համայնքների շահերը: Այժմ հյուսիսային նահանգների եւ թալիբների միջեւ առճակատումը կարող է ամենասարսափելի հետեւանքներն ունենալ աֆղանցի ժողովրդի եւ ամբողջ տարածաշրջանի համար: Հետեւաբար, ամեն ինչ պետք է արվի այս առճակատումից խուսափելու համար»,- ասել է նա: