Այս հարցի վերաբերյալ որեւէ հավելյան մեկնաբանություն չեմ կարող տալ. եթե կլինի նոր տեղեկատվություն, պատկան մարմինները հանդես կգան հայտարարությամբ: Այս մասին, այսօր՝ սեպտեմբերի 13-ին, ԱԺ-ում լրագրողների հետ զրույցում նշեց ԱԺ ՔՊ խմբակցության ղեկավար Հայկ Կոնջորյանը՝ անդրադառնալով փաստին, որ Գորիս-Կապան մայրուղու Որոտանի ճանապարհին ադրբեջանցիները կանգնեցնում են իրանական բեռնատարները եւ փող գանձում:
«Կան կոնկրետ մարմիններ, որոնք այս հարցով աշխատանք են տանում, դա նշանակում է, որ առաջիկայում կլինի հայտարարություն, մեկնաբանությունները գալիս են այդ մարմիններից:
Դրանից զատ, ընդդիմադիր խմբակցություններից մեկի կողմից առաջարկ հնչեց, որ ԱԺ-ում փակ քննարկում արվի համապատասխան գերատեսչությունների ներկայացուցիչների մասնակցությամբ՝ ՊՆ, ԱԱԾ եւ այլն: ԱԺ նախագահն էլ առաջարկեց գրավոր դիմել, քննարկենք, հասկանանք: Եթե այդ քննարկումը կայանա, պա պետք է հրավիրենք համապատասխան գերատեսչությունների ղեկավարներին: Ես այս պահին բավարարվում եմ ԱԱԾ հաղորդագրությամբ»,-ասաց նա:
Այս թեմայի վերաբերյալ Հայկ Կոնջորյանը որեւէ այլ հարցի չպատսխանեց:
