Մենք պետք է պատասխանենք մեկ կարեւոր իրավական հարցի՝ ինչպե՞ս է ձեւավորվել Հայաստանի Հանրապետությունը: Այն ձեւավորվել է շնորհիվ այն բանի, որ Հայկական ԽՍՀ-ն հռչակել է իր անկախությունը, փոխել անունը եւ դարձել Հայաստանի Հանրապետություն: Այս մասին սեպտեմբերի 15-ին Ազգային ժողովի նիստում Կառավարության ժամին հայտարարեց վարչապետ Նիկոլ Փաշինյանը՝ պատասխանելով «Հայաստան» դաշինքի պատգամավոր Արամ Վարդեւանյանին, ով բարձրացրեց անընդունելի ձեւակերպումների հարցը:
Վարչապետի խոսքով՝ շատերը չեն հասկանում, թե ինչ սպառնալիքներ կարող են առաջանալ պաշտոնյաների ձեւակերպումներից:
«Այո, մենք դա չենք նկատում: Հայաստանի Հանրապետությունը կազմավորվել է Հայկական ԽՍՀ-ի հիմքի վրա, եւ այն չի կարող սահմաններ չունենալ: Նման բան չի կարող լինել: Իսկ Հայաստանի Հանրապետության անկախության հռչակումից հետո, ԱՊՀ շրջանակներում ընդունվեցին փաստաթղթեր, որոնք նույնպես ուսումնասիրման կարիք ունեն: Սա այն հարցը չէ, որ ընդդիմությունը եւ իշխանությունները պետք է որոշեն միմյանց միջեւ: Սա քաղաքական մենամարտի համար ամենաանհարմար վայրն է», - պարզաբանեց Փաշինյանը՝ շեշտելով, որ կան առաջարկներ, որոնք ուղղակի բարձրաձայնել չի կարելի:
Վարչապետի խոսքով՝ թե իշխանությունները, թե ընդդիմությունը թույլ են տվել որոշակի սխալներ, հատկապես որոշակի ձեւակերպումների առումով, որոնք, ըստ Փաշինյանի, կարող էին եւ կարող են վնասել Հայաստանի շահերին:
«Մենք երբեմն մոռանում ենք արտաքին միջավայրի մասին: Եթե մեր կողմից լսվում է որեւէ անընդունելի ձեւակերպում, ապա ես խնդրում եմ ձեզ մեզ տեղյակ պահել այդ մասին: Ես ձեզ շատ շնորհակալ կլինեմ դրա համար: Այս ընթացքում մեզ պողպատե նյարդեր են պետք», - ասաց վարչապետը:
