Անվտանգության ճգնաժամը Հայաստանում դեռեւս հաղթահարված չէ։ Այս մասին Ազգային ժողովում ավանդական ճեպազրույցների ժամանակ սեպտեմբերի 17-ին ասաց «Հայաստան» ընդդիմադիր խմբակցությունից ԱԺ փոխնախագահ Իշխան Սաղաթելյանը։
Իսկ շաբաթվա գլխավոր թեման, փոխնախագահի խոսքով, Գորիս-Կապան ճանապարհին ադրբեջանական ոստիկանական անցակետի տեղադրումն է։
«Չնայած մենք կառավարության հետ ձեռք էինք բերել պայմանավորվածություն, որ Ազգային անվտանգության ծառայության տնօրենը օրերս գա Ազգային ժողով եւ մասնակցի այս թեմայի քննարկմանը, բայց նախատեսված հանդիպումն այդպես էլ չկայացավ»,- նշեց Սաղաթելյանը։
Ընդդիմադրի կարծիքով՝ Հայաստանի իշխանություններն ի վիճակի չեն սպասարկել եւ պաշտպանել հայ ժողովրդի, ընդհանուր առմամբ երկրի շահերը։
«Բարդագույն իրավիճակում հարցը լուծելու փոխարեն նրանք այդ տարածքները հայտարարում են ադրբեջանական, ինչը, մեր կարծիքով, պետական դավաճանության դասական օրինակ է»,- ընդգծեց ԱԺ փոխնախագահը։
