Հունաստանի վարչապետը հայտարարել է, որ մտադիր չէ սպառազինությունների մրցավազքի մեջ մտնել Թուրքիայի հետ եւ հույս ունի երկխոսության միջոցով լուծել տարաձայնությունները հարեւան երկրի հետ, սակայն Հունաստանը պետք է պաշտպանի իր տարածքն ու ինքնիշխանությունը, տեղեկացնում է AP-ը:
Ավելի վաղ Հունաստանը մոտ 3 միլիարդ եվրո արժողությամբ պաշտպանական համաձայնագիր էր ստորագրել Ֆրանսիայի հետ, ներառյալ հունական նավատորմի համար երեք ֆրանսիական ֆրեգատի գնումը:
«Մենք չենք կարող անտեսել այն փաստը, որ ապրում ենք շատ դժվար տարածաշրջանում: Սա աշխարհագրական իրողություն է, որը մենք չենք կարող անտեսել»,- ասել է Կիրիակոս Միցոտակիսը Աթենքում Ժողովրդավարության ֆորումի ժամանակ:
«Ես մտադիր չեմ սպառազինությունների մրցավազքի մեջ մտնել Թուրքիայի հետ, եւ միշտ բարեկամության ձեռք եմ մեկնում Թուրքիային: Մենք շատ տարաձայնություններ ունենք բազմաթիվ հարցերի շուրջ, բայց պետք է երկխոսության միջոցով այդ տարաձայնությունները լուծելու տարբերակ լինի»,- ասել է վարչապետը: «Միեւնույն ժամանակ, մենք կպաշտպանենք մեր տարածքը, մեր տարածքային ամբողջականությունը, մեր ինքնիշխանությունը, մեր ինքնիշխան իրավունքները, եւ դրա համար մեզ ուժեղ զսպում է պետք»:
Ֆրանսիայի հետ Հունաստանի ստորագրած համաձայնագիրը ներառում է երրորդ երկրի հարձակման դեպքում փոխօգնության մասին համաձայնագիր:
Այս կետում «ըստ էության ասվում է, որ եթե երկրներից որեւէ մեկը հարձակման ենթարկվի, եթե նրա տարածքը կասկածի տակ դրվի, նրա ինքնիշխանությունը վիճարկվի, ապա մյուս կողմը պարտավոր է օգնել նրան»,- ասել է Միցոտակիսը: «Եւ սա ռազմավարական գործընկերություն է, որը, իմ կարծիքով, դուրս է գալիս փոխօգնության մասին դրույթների շրջանակներից, որոնք այժմ ներառված են եվրոպական պայմանագրերում»:
Նրա խոսքով, գործարքը չի մրցակցում ո՛չ ՆԱՏՕ-ի, ո՛չ էլ այլ դաշինքների հետ:
«Մենք ռազմավարական գործընկերություն ունենք Միացյալ Նահանգների հետ, որը թափ է հավաքում: Մենք պատրաստվում ենք ԱՄՆ-ի հետ ստորագրել նոր հնգամյա փոխադարձ պաշտպանության եւ համագործակցության պայմանագիր»,- ասել է նա՝ հավելելով, որ «Հունաստանը, Ֆրանսիան եւ ԱՄՆ-ը ՆԱՏՕ-ի անդամ են: «Այնպես որ, իրական մրցակցություն այստեղ չկա: Մենք խոսում ենք լրացուցիչ նախաձեռնությունների մասին»:
Հունաստանն արդեն գնել է 18 ֆրանսիական Rafale կործանիչ եւ մտադիր է եւս 6-ը գնել՝ իր զինված ուժերի արդիականացման ծրագրի շրջանակներում: