Հարկային օրենսգրքի փոփոխությունները կվերացնեն արտոնություններն այն քաղաքացիների համար, ովքեր բնակարան են ձեռք բերում Երեւանի նորակառույց շենքերում: Այս մասին հոկտեմբերի 5-ին Հայաստանի Ազգային ժողովի նիստին Հարկային օրենսգրքում փոփոխություններ կատարելու մասին օրինագծի քննարկման ժամանակ ասաց ՀՀ ֆինանսների փոխնախարար Արման Պողոսյանը:
Նրա խոսքով` նախագիծը վերաբերում է միայն նոր հիփոթեքային վարկերին եւ հետադարձ ուժ չի ունենա:
Այդպես, 2015 թվականին «Եկամտահարկի մասին» օրենքում փոփոխությունն ընդունվեց, ինչը հետագայում ամրագրվեց Հարկային օրենսգրքում, համաձայն որի նոր շենքերի բնակարանների գնորդներին, ինչպես նաեւ նոր առանձնատների գնորդներին վերադարձնում էին եկամտահարկը հիփոթեքային վարկերի տոկոսների չափով: Օրինագիծն աճ է խթանել շինարարական ոլորտում:
«Արտոնության տարիների ընթացքում, հատկապես` վերջին երկու տարվա ընթացքում, կտրուկ աճել է ֆինանսավորման տեսքով պետական օգնություն ստացող քաղաքացիների թիվը: Եթե 2015-2017 թվականներին ծրագրի շահառու էր դառնում տարեկան մոտ 800 մարդ, ապա 2018-2019 թվականներին տարեկան աճը կազմում էր մոտ 2000 մարդ, իսկ 2020-ին` արդեն 5200: Այդ տարիների ընթացքում կտրուկ աճել է նաեւ եկամտահարկի չափը, որը պետբյուջեից վերադարձվում է մեր հայրենակիցներին: Եթե 2016-2017 թվականներին պետբյուջեից այս ծրագրին հատկացվող ֆինանսական միջոցների տարեկան աճը կազմել է մոտ 1 միլիարդ դրամ, ապա 2019-ին աճը կազմել է 3.3 միլիարդ դրամ, իսկ 2020-ին` 5.4 միլիարդ դրամ` այդպիսով հասնելով 13.3 միլիարդ դրամի»,- պարզաբանեց փոխնախարարը:
Իսկ այժմ, ըստ օրինագծի, հիպոթեքային վարկի դիմաց վճարված տոկոսների դիմաց հարկի նվազեցման վերադարձն աստիճանաբար կչեղարկվի, ճիշտ է` 6 ամիս ընդմիջումով: 2022 թվականի հուլիսի 1-ից փոփոխությունները կազդեն Երեւանի փոքր կենտրոնի վրա, 2023 թվականի հունվարի 1-ից` մեծ կենտրոնի, 2023 թվականի հուլիսի 1-ից` կենտրոնին հարող թաղամասերի, եւ 2025 թվականի հունվարի 1-ից` ամբողջ Երևանի վրա:
«Այնուամենայնիվ, պետությունը կշարունակի այս պրակտիկան մարզերում»,- շեշտեց Պողոսյանը:
Նա նաեւ նշեց, որ օրենքի գործելու ընթացքում մարզերին բաժին է ընկել բնակարանաշինության ընդամենը 7 տոկոսը, իսկ Երեւանին` 93 տոկոսը:
Ըստ փոխնախարարի` միանգամայն ակնհայտ է, որ կառուցապատողները ձգտում են առավելագույն ֆինանսական շահի, իսկ քանի որ շինարարական ծախսերը մարզային քաղաքում եւ Երևանի կենտրոնում գրեթե հավասար են, բացառությամբ հողի արժեքի, կառուցապատողը ձգտելու է կառուցել մայրաքաղաքի կենտրոնում` բնակարանները հնարավորինս թանկ վաճառելու համար:
Իսկ մայրաքաղաքի բնակարանային ֆոնդը թարմացնելու համար քնոր սխեմա է քննարկվում: Այդպես, կառուցապատողը քանդում է վթարային շենքը, դրա փոխարեն կառուցում նորը` ավելի շատ հարկերով, անվճար տեղավորում է դրա մեջ նախկին բնակիչներին, իսկ մնացած բնակարանները վաճառում է:
Այդուհանդերձ, ֆինանսների նախարարության նախաձեռնությունը բազմաթիվ հարցեր առաջացրեց պատգամավորների մոտ, այդ թվում` իշխող մեծամասնության ներկայացուցիչների:
Այդպես, իշխող «Քաղաքացիական պայմանագիր» կուսակցության պատգամավոր Հովիկ Աղազարյանը կրկին առաջարկեց եկամտահարկի վերադարձը պահել ուժի մեջ, բայց` միայն մինչեւ 25 մլն ՀՀ դրամ արժողությամբ բնակարանների համար: Այսինքն` միջին եւ միջինից ցածր բնակարանների արժեքի համար, որպեսզի արտոնությունն իրական սոցիալական բնույթ ունենա:
«Միեւնույն ժամանակ, մարզերում այս շեմը պետք է սահմանվի մինչեւ 35 մլն դրամի սահմաններում»,- ասաց խորհրդարանականը: Ընդ որում, նա դեմ չէ, որպեսզի փոփոխությունները տարածվեն Երեւանի փոքր կենտրոնի ու մեծ կենտրոնի վրա: