Սա անհասկանալի գործարք է, կարծում եմ՝ շատ մարդիկ կան, որոնք նույնպես չեն հասկանում՝ ինչու կատարվեց այս գործարքը: Այս մասին այսօր՝ հոկտեմբերի 5-ին, ԱԺ-ում լրագրողների հետ ճեպազրույցի ժամանակ նշեց «Հայաստան» խմբակցության պատգմավոր Վահե Հակոբյանը՝ անդրադառնալով նրան, որ Զանգեզուրի պղնձամոլիբդենային կոմբինատի բաժնետերերից «Արդյունաբերական ընկերություն»-ը ՀՀ կառավարությանն է նվիրաբերել Ընկերության 25% բաժնետոմսերը։
«Բայց ես պետք է ներողություն խնդրեմ ձեզնից, քանի որ դեռ շատ բաներ կան պարզելու, ես շատ չեմ կարող տարածվել այս հարցում, բայց խոսք եմ տալիս, որ երբ բոլոր կողմերը կարտահայտվեն եւ կհստակեցվի, թե սա ինչ նպատակ էր հետապնդում, ես անպայման կխոսեմ:
Իմ մոտ կա հստակ տպավորություն, որ նույն այս կառավարությունը, մեղմ ասած, գցել է թյուրիմացության մեջ նույն ձուլարանների մասով, ներդրումների մասով: Ես շարունակում եմ պնդել, որ Հայաստանում անհնարին է կառուցել ձուլարան: Իհարկե, հնարավոր է, բայց ինչ հետեւանքներ դա կունենա, դա է հարցը»,-ասաց նա:
Դիտարկմանը, թե ինչպես է սեփականատերերի փոփոխություն եղել եւ ռուսական «Արդյունաբերական ընկերությունը» դարձել 60 տոկոսի սեփականատեր, Վահե Հակոբյանը պատասխանեց. «Երբ սեփականատեր ընկերությունն իր բաժնետոմսերն ուզում է վաճառել մեկ ուրիշին, մյուս բաժնետերերը դրանից տեղյակ չեն, նրանք դրա մասին իմանում են, երբ գործարքը ֆիքսվել է: Հիմա մի X ընկերություն վաճառել է Y-ին, այդ Y-ն էլ իր գնածից տոկոս է նվեր տվել կառավարությանը: Թե սա ինչ նպատակ է հետապնդում, շուտով կիմանանք»:
Նա նաեւ հավելեց, որ երկրորդ նախագահ Ռոբերտ Քոչարյանի խոսքից ինքը հասկացել է, որ կառավարությանն անցած 15 տոկոսը ղեկավարում է հենց կառավարության աշխատակազմը: