Շատ կարեւոր է, որպեսզի Հայաստանն այնպիսի իրավական համակարգ ունենա, որը թույլ կտա բիզնեսին զարգանալ արդար միջավայրում։ Այս մասին հոկտեմբերի 7-ին, «Հայաստանում իրավաբանական անձանց քրեական պատասխանատվության հեռանկարները» թեմայով քննարկման ժամանակ, ասաց Հայաստանում Մեծ Բրիտանիայի եւ Հյուսիսային Իռլանդիայի Միացյալ Թագավորության Արտակարգ եւ լիազոր դեսպան Ջոն Գալագերը։
Նրա խոսքով՝ այսօր Հայաստանում հետաքրքրություն կա տնտեսական հանցագործությունների դեմ պայքարի հարցում, ինչպիսին են խարդախությունը, հարկերի չվճարումը, որոնք կարող են լուրջ վնաս հասցնել տնտեսությանը։
Նա նշեց, որ այդպիսի հանցագործությունները բացասաբար են անդրադառնում նաեւ իրավական համակարգի վրա։
«Հույս ունենք, որ տնտեսական հարաբերություններում կորպորատիվ պատասխանատվության զարգացումը կօգնի Հայաստանի բիզնեսին ունենալ ավելի հուսալի իրավական մեխանիզմներ, բարձրացնել Հայաստանի վարկանիշը միջազգային ասպարեզում։ Մեծ Բրիտանիան այս ոլորտում մեծ փորձ ունի։ Հայաստանը կարող է ուսումնասիրել դրանք եւ օգտվել դրանցից»,- ավելացրեց դեսպանը։