Իրավաբանական անձանց համար քրեական պատասխանատվություն մտցնելն ուղղված է բիզնեսի խթանմանը եւ երաշխիքներ կստեղծի նրանց ավելի թափանցիկ գործունեության համար։ Այս մասին հոկտեմբերի 7-ին, «Հայաստանում իրավաբանական անձանց քրեական պատասխանատվության հեռանկարները» թեմայով քննարկման ժամանակ, ասաց ՀՀ արդարադատության փոխնախարար Արմեն Հովհաննիսյանը։
Նա համամիտ չէ այն կարծիքին, թե օրենքի ընդունումը կարող է խանգարել Հայաստանում խոշոր ներդրումներին։
«Այս առնչությամբ խոչընդոտներ եւ խնդիրներ չկան»,- նշեց պաշտոնյան։
Հովհաննիսյանը այդ նորմի ընդունումը կապեց իրավաբանական անձանց ներգրավմամբ քրեական գործերի հետաքննության արդյունավետության բարձրացման անհրաժեշտության եւ միջազգային համագործակցության բարձրացման հետ, ինչը կարեւոր է կոռուպցիայի դեմ պայքարի տեսակետից։
«Բացի այդ, օրենքի ընդունումը բխում է Հայաստանի միջազգային պարտավորություններից»,- նշեց նա։
Փոխնախարարը հիշեցրեց, որ օրենքն ուժի մեջ կմտնի 2023թ. հունվարի 1-ից։