News
Լրահոս
News
Ուրբաթ
Դեկտեմբեր 03
Տեսնել լրահոսը

Իշխող «Քաղաքացիական պայմանագիր» կուսակցությունը, չունենալով ազդեցիկ ներկայացուցիչներ մարզերում եւ կոնկրետ համայնքներում, ընտրել էր ռազմավարություն, ըստ որի անհրաժեշտ էր սպասել իշխանությունների կողմից համայնքների չսիրված ղեկավարների լիազորությունների ավարտին, որից հետո «Քաղաքացիական պայմանագիրը» նրանց փոխարեն նշանակում էր իշխանություններին հավատարիմ ներկայացուցիչների՝ համայնքների ղեկավարների ժամանակավոր պաշտոնակատարներ: Հոկտեմբերի 18-ին, հյուրընկալվելով NEWS.am-ին, TALK TIME հաղորդման ժամանակ այս մասին հայտարարեց քաղտեխնոլոգ Արմեն Բադալյանը՝ բացատրելով խոշորացված Գորիս համայնքի տեղական ինքնակառավարման մարմինների ընտրություններում ընդդիմության հաղթանակի պատճառը:

Այս մարդիկ, ըստ փորձագետի, առկա վարչական ռեսուրսներին տիրապետելու բավական ժամանակ են ունեցել:

«Այսպիսով, օգտագործելով վարչական ռեսուրսները, իշխանությունները փորձեցին հաղթել ընտրություններում: Վարչապետ Նիկոլ Փաշինյանի եւ նրա թիմի համար շատ կարեւոր էր հաղթանակը Հայաստանի Սյունիքի մարզում: Այս հաղթանակը իշխանության համար քաղաքական նշանակություն ուներ»,- ասաց Բադալյանը:

Նա հիշեցրեց, որ վերջին արտահերթ խորհրդարանական ընտրությունների ժամանակ իշխանություններն ակտիվորեն ներգրավել էին ուժայինների, մասնավորապես ոստիկանության աշխատակիցների եւ զինվորականների, ինչը, ի վերջո, ազդել էր Սյունիքի մարզում ընտրությունների արդյունքների վրա: Իշխանությունն այնտեղ հաղթեց՝ ծանր պարտության մատնելով ընդդիմությանը:

«Բայց տեղական ինքնակառավարման մարմինների ընտրություններում զինվորականներին ներգրավել չի կարելի: Այնտեղ անհնար է նման բարձր մասնակցություն ապահովել: Արդյունքում, գերակշռեցին տեղի բնակչության ձայները, ինչը թույլ տվեց տեսնել իրական պատկերը: Շուռնուխ գյուղում նույնպես ակնհայտ դարձավ իրերի իրական դրությունը»,- պարզաբանեց քաղտեխնոլոգը:

Նա ուշադրություն հրավիրեց այն հանգամանքի վրա, որ Հայաստանում գյուղերն իրականում զրկված են այլընտրանքային տեսակետի հասանելիությունից: Այնտեղ ակտիվ քարոզչության մեծ մասն իրականացվում է Հայաստանի հանրային հեռուստատեսության միջոցով, որը միշտ արտացոլում է իշխանությունների դիրքորոշումը:

«Այն վարում է բաց, միակողմանի քարոզչություն՝ աջակցելով իշխանությանը: Այսպիսով, Հայաստանում գյուղերը միշտ քվեարկել են իշխանության օգտին: Բացի այդ, ընդդիմությունն այնտեղ չի ունեցել որեւէ վառ ներկայացուցիչ, ինչը նույնպես ձեռնտու էր Փաշինյանին»,- հայտարարեց փորձագետը:

Հիշեցնենք, որ նախնական արդյունքներով խոշորացված Գորիս համայնքի 18 ընտրատեղամասերից 15-ում «Հայաստան» ընդդիմադիր դաշինքի թեկնածու Առուշ Առուշանյանը հաղթել է տեղական ինքնակառավարման մարմինների ընտրություններում:

Առուշանյանի օգտին քվեարկել է 4867 ընտրող, իսկ «Քաղաքացիական պայմանագիր» կուսակցության թեկնածու Վլադիմիր Աբունցի օգտին՝ 2643 ընտրող:

!
Այս նյութը հասանելի է նաև   Русский
Տպել
Ամենաշատ