2021 թվականին էականորեն, գրեթե 20 տոկոսով աճել է արտահանումը, ընդ որում աճել է ոչ միայն հանքահումքային ռեսուրսի, այլեւ պատրաստ արտադրանքի եւ գյուղմթերքի արտահանումը: Այս մասին, այսօր՝ հոկտեմբերի 25-ին, ԱԺ հանձնաժողովների համատեղ նիստում 2022 թվականի բյուջեի նախագծի քննարկման ժամանակ նշեց ՀՀ վարչապետ Նիկոլ Փաշինյանը:
Նրա խոսքով, շինարարության ծավալներն այս տարի աճել են 7 տոկոսով, ծառայությունները՝ ավելի քան 5 տոկոսով. «Այս գործոնները 2022-ին 7 տոկոս տնտեսական աճի թիրախը դարձնում են իրատեսական, մանավանդ արդեն մեկնարկել են մի քանի խոշոր ներդրումային ծրագրեր, որոնց առաջնային թիրախը Հայաստանը հանքահումքային ռեսուրս արտահանող երկրից զարգացած մետալուրգիա եւ մետաղի վերամշակման հնարավորինս երկար շղթա երկիր դարձնելն է»,-ընդգծեց վարչապետը:
