Վրաստանի իշխանությունները հրաժարվում են հացադուլի մեջ գտնվող նախկին նախագահ Միխեիլ Սաակաշվիլիին բանտից մասնավոր կլինիկա տեղափոխել, քանի որ վախենում են անկարգություններից բուժհաստատությունում։ Այս մասին «Իմեդի» հեռուստաընկերությանը տված հարցազրույցում ասել է Վրաստանի վարչապետ Իրակլի Ղարիբաշվիլին։
Ղարիբաշվիլին պնդում է, որ հոսպիտալացումը քաղաքացիական հատվածի հիվանդանոցում, որտեղ «անվտանգության պայմաններ չկան», «Սաակաշվիլիի պլանի» մաս է կազմում, հաղորդում է «Նովոստի-Գրուզիա»-ն:
«Իր ծրագրի համաձայն՝ նրան պետք է տեղափոխենք մասնավոր կլինիկա։ Ավելին, նրանց պլանն է մոբիլիզացնել մի քանի հազար մարդ՝ 4-5 կամ 10 հազար։ Մենք ստիպված կլինենք ոստիկանություն տեղակայել, հատուկ միջոցներ կիրառել եւ մնալ հավերժական քաոսի ու անկարգությունների մեջ»,- ասել է Ղարիբաշվիլին։
Մեկնաբանելով նախկին նախագահի հացադուլը՝ նա նաեւ հայտարարել է, որ «մարդն ունի ինքնասպանության իրավունք», եւ պետությունը պատասխանատվություն չի կրում դրա համար։
«Օրենքն ասում է, որ մարդն ունի ինքնասպանության իրավունք։ Եթե մարդը որոշի ինքնասպան լինել, կարող է ինքն իրեն սպանել, բայց, բնականաբար, պետությունը պատասխանատվություն չի ստանձնի դրա համար»,- ասել է նա։
Վրաստանի կառավարության ղեկավարը բացառել է նաեւ Սաակաշվիլիի՝ Ուկրաինա տեղափոխումը կամ վաղաժամկետ ազատումը։ Ղարիբաշվիլիի խոսքով՝ դա կնշանակի, որ «կառավարությունը չի հարգում երկրի օրենքները»։
«Իհարկե, Սաակաշվիլիի վաղաժամկետ ազատ արձակումը բացառվում է։ Բացառվում է նաև դրա տեղափոխումն Ուկրաինա։ Եթե մենք անենք մեկը կամ մյուսը, դա նշանակում է, որ մեր ողջ կառավարությունը պետք է հայտարարություն գրի եւ հաջորդ օրը հրաժարական տա»,- ասել է Ղարիբաշվիլին:
Սաակաշվիլին ձերբակալվել էր հոկտեմբերի 1-ին Թբիլիսիում այն բանից հետո, երբ գաղտնի ժամանեց Ուկրաինայից։ Նա բանտարկվել է դատարանի կողմից ավելի վաղ կայացված վճիռների հիման վրա պաշտոնեական հանցագործությունների մասով, որոնցում նրան մեղադրել էր «Վրացական երազանքի» կառավարությունը։
Սաակաշվիլին իրեն քաղբանտարկյալ է համարում եւ ի նշան բողոքի հացադուլ է հայտարարել բանտում գտնվելու առաջին իսկ օրվանից։ Նա իր նամակներից մեկում ասել է, որ չի համաձայնի սնվել, սակայն համաձայնել է ընդունել բժիշկների նշանակած դեղերը։
Սաակաշվիլիի անձնական բժիշկ Նիկոլոզ Կիփշիձեի խոսքով՝ նախկին նախագահի վիճակը գնալով վատանում է, եւ նրան հոսպիտալացում է անհրաժեշտ։ Իշխանությունները նշում են, որ հոսպիտալացման դեպքում Սաակաշվիլիին կուղարկեն Գլդանիի բանտի հիվանդանոց։
Մինչդեռ բժիշկները, օմբուդսմենը, իրավաբանները եւ անձամբ Սաակաշվիլին կարծում են, որ նա քաղաքացիական բազմապրոֆիլային կլինիկայի մակարդակով ծառայության կարիք ունի։ Բացի այդ, փաստաբաններն ասում են, որ նախկին նախագահի համար բանտային հիվանդանոցում լինելն անվտանգ չէ. նրանք կասկածում են, որ կառավարությունը կարող է կազմակերպել կամ հրահրել նրա սպանությունը։
