Հայաստանի ԱԳՆ-ն ղարաբաղյան հիմնախնդրի կարգավորման վերաբերյալ Եվրամիության եւ Հայաստանի միջեւ Համապարփակ եւ ընդլայնված գործընկերության համաձայնագրի CEPA վերանայման հարց չի բարձրացրել։ Այս մասին նոյեմբերի 25-ին կայացած քննարկման ժամանակ ասաց ՀՀ ԱԳՆ Եվրոպական հարցերի վարչության ղեկավար Ստեփան Մանվելյանը։
Նա հիշեցրեց, որ CEPA-ի մասով արտաքին գործերի նախարարության գործառույթները ղարաբաղյան հակամարտության կարգավորման հարցը, ահաբեկչության դեմ պայքարն եւ ռեադմիսիան են:
Դոկտրինալ առումով ցանկացած փաստաթուղթ, նրա խոսքով, կարող է փոփոխվել կողմերի պատրաստ լինելու դեպքում:
«2017 թվականին, երբ փաստաթուղթը ստորագրվեց, ձեւակերպումը շատ հստակ էր եւ բխում էր ԵՄ-ի եւ Հայաստանի դիրքորոշումից, որ հակամարտությունը պետք է լուծվի փաստաթղթերի հիման վրա, որոնք հղումներ են պարունակում ԵԱՀԿ եզրափակիչ ակտին, ՄԱԿ-ի կանոնադրությանը եւ տարածքային ամբողջականության, ուժի չկիրառման եւ ժողովուրդների ինքնորոշման իրավունքի սկզբունքներին։ Մեր մոտեցումը չի փոխվել, սկզբունքները պետք է ամրագրվեն եւ հիմնվեն դրա վրա։ Այն ժամանակ դա այն էր, ինչ Հայաստանը ցանկանում էր ամրագրել, եւ այն, ինչ համաձայնեցված էր ԵՄ-ի հետ։ Կողմերից յուրաքանչյուրը կարող է իր անհամաձայնությունը կամ փաստաթուղթը վերանայելու ցանկություն հայտնել: Պետք է գնահատել՝ արդյոք մեր շահերից է բխում այդ հարցի բարձրացումը»,- ասաց Ստեփան Մանվելյանը։
Ինչ վերաբերում է ԵՄ-ի եւ Ադրբեջանի հարաբերություններին, եթե կողմերից մեկը Եվրամիությունն է, ապա, նրա կարծիքով, հակամարտությունն ուժի կիրառմամբ լուծելու մեխանիզմ լինել չի կարող:
«Կամրագրվի հակամարտության խաղաղ կարգավորման սկզբունքը, կամ կլինի միայն տարածքային ամբողջականության սկզբունքը, կամ կլինի ժողովուրդների ինքնորոշման իրավունքի սկզբունքը, թե ոչ` այդ ամենը գտնվում է կողմերի շահերի հարթության մեջ։ Փաստաթուղթը մեզ հասանելի չէ։ Բայց մենք պետք ապավինենք ԵՄ-ի հետեւողականությանը ղարաբաղյան հիմնախնդրի խաղաղ կարգավորման հարցում իր դիրքորոշման մեջ։ Եթե նույնիսկ այդ սկզբունքը ամրագրված չէ փաստաթղթում, ապա այն ամեն դեպքում պարտադիր է իրականացման համար։ Միջազգային իրավունքի համաձայն՝ այս սկզբունքը չի կարող վերանայվել կամ խախտվել։ ԵՄ երկրների ճնշող մեծամասնությունն այնպիսի մոտեցում չունի, որ ղարաբաղյան հակամարտությունը կարգավորված է։ Հակառակը, կա մոտեցում, որ հակամարտությունը չի լուծվել, եւ այն դեռ պետք է լուծվի»,- եզրափակեց ՀՀ ԱԳՆ ներկայացուցիչը։
