Նիկոլ Փաշինյանից հետո Հայաստանում իշխանության եկողը կամիկաձե է, քանի որ նրանք ստիպված են լինելու դիմակայել նախորդ իշխանության ստեղծած ու թողած ամենալուրջ մարտահրավերներին։ Այս մասին դեկտեմբերի 1-ին լրագրողների հետ հանդիպման ժամանակ հայտարարեց Հայաստանի դեմոկրատական կուսակցության նախագահ Արամ Սարգսյանը։
Քաղաքական գործչի խոսքով` խոսքը, մասնավորապես, պարտված պատերազմի, դրա հետեւանքների, հասարակության մեջ առաջացած պառակտման, երկրի տնտեսական ծանր վիճակի մասին է։ Խոսքը նաեւ Գորիս-Կապան ճանապարհի մի հատվածն Ադրբեջանին փոխանցելու մասին է։ «Դա Հայաստանն Իրանի հետ կապող միջպետական մայրուղի է։ Ինչի՞ հիման վրա են երկրի իշխանությունները որոշել այն փոխանցել Բաքվի վերահսկողության տակ։ Այն մոտ 21 կմ է։ Դուք նման բան երբեք չեք տեսնի:
Հայաստանի իշխանությունները կամավոր հիմունքներով պարզապես որոշեցին իրենց երկրի մի կտորը հանձնել թշնամուն, այն էլ՝ առանց նախապայմանների։ Նրանք ատամներով պետք է պահեին այս ճանապարհը»,- նշեց Սարգսյանը։
Խնդիրն, ըստ ընդդիմադիրի, այն է, որ չեն գործում այն լծակներն ու մեխանիզմները, որոնք տեսականորեն պետք է սահմանափակեին իշխանությունների լիազորությունները՝ ի դեմս Կառավարության։ Դա, ըստ քաղաքական գործչի, վերաբերում է թե՛ նախագահության ինստիտուտին, թե՛ խորհրդարանին։ «Նախագահն, օրինակ, ընդհանրապես հայտարարել է, որ, ըստ Սահմանադրության, ինքը նման լիազորություններ չունի։ Սակայն, ըստ
Սահմանադրության, նախագահը պետության ղեկավարն է։ Այսինքն՝ նա երկրի պաշտպանն է։ Նա չի կարող պարզապես հանդես գալ ինչ-որ դեկլարատիվ հայտարարություններով։ Նա պարտավոր է որոշակի գործողություններ եւ քայլեր ձեռնարկել»,- պարզաբանել է ՀԴԿ նախագահը։
Այդուհանդերձ, Սարգսյանը խոստովանեց, որ առանց ժողովրդի միասնության ներկայիս իշխանության օրոք երկրի շահերի պաշտպանությունն ապահովել հնարավոր չէ։ Նա կոչ արեց հայերին համախմբվել եւ պաշտպանել արժանապատիվ կյանքի իրենց իրավունքները։ Միաժամանակ, նրա կարծիքով, Հայաստանին ժամանակ է պետք վերականգնվելու համար։ Սակայն այդ ժամանակը չափազանց կարճ է, ուստի համախմբման գործընթացը պետք է ընթանա արագացված տեմպերով։ Ընդդիմադիրը նաեւ կոչ արեց ապահովել Ղարաբաղի եւ սփյուռքի մասնակցությունը։
«Հասարակության մոբիլիզացումը բարդ խնդիր է։ Բայց ամեն ինչ հնարավոր է։ Դա լուծելի խնդիր է: Պետք է հասնել Հայաստանի, Ղարաբաղի, Սփյուռքի միասնությանը: Ազգն ինքը պետք է ապահովի ամբողջ կազմակերպչական գործընթացը, ապահովի միասնությունը։ Քանի դեռ ժողովուրդն ինքը դա չի անում, ոչ ոք մատը մատին չի տա։ Այս կամ այն կառույցների մասնակցությունը, որոնք գործում են թե՛ Հայաստանում, թե՛ Ղարաբաղում, թե՛ Սփյուռքում բավական կլինի»,- եզրափակեց ՀԴԿ նախագահը։
