Ներկայում տաք երկրներում ձմեռելու նպատակով ռուսաստանցիներն ամենից հաճախ ընտրում են Հայաստանը, Թաիլանդը, Թուրքիան, Ադրբեջանն ու Շրի Լանկան, հայտնել է «Յանդեքս»-ը ավիատոմսերը որոնելու եւ ամրագրելու վերլուծության արդյունքների հիման վրա: Վիետնամն ու Ինդոնեզիան կորցրել են իրենց դիրքերը ցածր հասանելիության պատճառով կորոնավիրուսի համավարակի ֆոնին սահմանափակումների կապակցությամբ, նշում է ընկերությունը:
«Հեռավար աշխատանքի շնորհիվ ավելի մեծ թվով մարդիկ են նախընտրում ձմեռել տաք երկրներում: «Յանդեքս: Ճանապարհորդություններ» էջի վերլուծաբաններն ուսումնասիրել են ավիատոմսերի որոնման ու ամրագրման տվյալներն այն ուղղություններով, որտեղ այս ձմեռ կմեկնեն ռուսաստանցիները: Պարզվել է, որ երկարատեւ ուղեւորությունների համար ամենատարածված երկրներն են Հայաստանը, Թաիլանդը, Թուրքիան, Ադրբեջանն ու Շրի Լանկան: Իսկ ամենասիրված ուղղություններն են Երեւանը, Փհունեթը, Բաքուն, Կոլոմբոն ու Ստամբուլը»,-հայտնել են «Յանդեքսի» մամուլի ծառայությունից:
Այս սեզոնում ամենամատչելի ավիաթռիչքը դեպի Հայաստան է ու Թուրքիա. միջինում 16,2 հազար ռուբլի հետադարձով չվերթի դիմաց, ամենաթանկը՝ դեպի Թաիլանդ է (ավելի քան 58 հազար ռուբլի) եւ ԱՄՆ (շուրջ 49 հազար ռուբլի), ասվում է հաղորդագրության մեջ:
Միջինում օգտատերերը պատրաստվում են բնակվել տաք վայրերում հինգ շաբաթ տեւողությամբ: «Շրի Լանկա, Հայաստան ու Սերբիա նրանք մեկնում են միջինում 4 շաբաթով, իսկ Թաիլանդ, Հնդկաստան ու ԱՄՆ՝ 5-6 շաբաթով»,-հաշվարկել են վերլուծաբանները:
«Յանդեքս: Ճանապարհորդություններ» հարթակի ղեկավար Իրինա Ռեյդերի խոսքով՝ դեպի արտերկիր երկարատեւ ձմեռային ուղեւորությունների նկատմամբ հետաքրքրությունն աստիճանաբար վերականգնվում է: «Ի տարբերություն նախորդ տարվա ցուցանիշների՝ օգտատերերի թիվը, որոնք որոշել են ձմեռել մոլորակի տաք անկյուններում, աճել է 20 տոկոսով: Նրանց թիվը դեռեւս 60 տոկոսով պակաս է, քան նախքան համավարակը, սակայն միտումը շարունակվում է: Բացվում են նոր ուղղություններ, հետզհետե նվազում են գները, եւ զբոսաշրջիկների թիվն ավելանում է»,-ասել է նա:
