Սուրբծննդյան տոների կապակցությամբ Ստոկհոլմից 175 կմ հյուսիս-արեւմուտք կանգնեցված հսկա ծղոտե այծն ուրբաթ գիշեր հրկիզվել է, հաղորդում է SVT-ն:
Դեպքի վայրում ձերբակալվել է 40-ամյա մի տղամարդ՝ Կալմար քաղաքից։ Նախնական տվյալներով՝ հրդեհը բռնկվել է այն բանից հետո, երբ հրկիզվել էր մոտակայքում կանգնեցված մեկ այլ` ավելի փոքր այծի ֆիգուրը: Հեռուստաալիքի տվյալներով՝ փրկարարներն օպերատիվորեն ժամանել են, սակայն, հրշեջների խոսքով, «ծղոտն այրվում է բենգալյան կրակի պես»։
Վերջին տասնամյակների ընթացքում ծղոտե այծը լայնորեն հայտնի է դարձել ոչ այնքան իր չափսերով, որքան սուրբծննդյան տոների նախաշեմին հրկիզման բազմաթիվ փորձերով: Այդպես, 2005 թվականին Ձմեռ պապի կերպարներով հրկիզողներն այրեցին ֆիգուրը՝ նետեր արձակելով դրա վրա, իսկ 1976 թվականին այն պարզապես քանդվեց ավտոմեքենայով։ Քաղաքի գլխավոր սուրբծննդյան խորհրդանիշը վանդալներից պաշտպանելու համար դրա վրա տեսախցիկներ էին տեղադրվել, սակայն 2009 թվականին հաքերներին հաջողվեց անջատել բոլոր սարքերը, իսկ այծը տոնից առաջ կրկին այրվեց։ Հաճախ ոստիկանները բերման էին ենթարկում հանցագործներին, որոնք պատիժ էին ստանում ազատազրկման եւ տուգանքի տեսքով։ Անցած չորս տարիների ընթացքում անվտանգության բարձրացման շնորհիվ ոչ ոք չի դիպչել քաղաքի գլխավոր Սուրբ Ծննդյան ատրիբուտին։
13 մ բարձրությամբ, 7 մ երկարությամբ եւ 5 տոննա քաշով ծղոտե այծն առաջին անգամ հայտնվել էր Եվլեում 1966 թվականին։ Գաղափարի հեղինակներն էին գովազդի փորձագետ երկու եղբայրները, ովքեր նպատակ ունեին ուշադրություն հրավիրել նախամանորյա առեւտրի վրա։
Այծի շինարարությունը տեւում է 1000 աշխատանքային ժամ եւ արժե 100000 շվեդական կրոն (ավելի քան 11000 դոլար):
