Հայաստանի եւ ԵՄ-ի միջեւ վիզային ռեժիմի ազատականացման շուրջ հանդիպումներն ու քննարկումները շարունակվում են Միության անդամ տարբեր երկրների հետ։ Մասնավորապես, հանդիպումներ են անցկացվում ոստիկանության եւ միգրացիոն ծառայությունների մակարդակով։ Այս մասին դեկտեմբերի 30-ին Երեւանում լրագրողների հետ հանդիպման ժամանակ հայտարարեց Հայաստանում Լեհաստանի արտակարգ եւ լիազոր դեսպան Պավել Չեպլակը` պատասխանելով Հայաստանի եւ Եվրամիության միջեւ Համապարփակ ընդլայնված գործընկերության համաձայնագրի շրջանակներում վիզային ռեժիմի հնարավոր ազատականացման մասին հարցին։

Դեսպանի խոսքով՝ Հայաստանի քաղաքացիների համար վիզային ռեժիմի ազատականացումը հնարավոր է, ինչպես եղավ Վրաստանի, Ուկրաինայի եւ Մոլդովայի դեպքում։

«Սակայն, ժամկետների մասին դեռ վաղ է խոսել»,- ասաց Չեպլակը:

Այս համատեքստում, ինչպես նշեց դեսպանը, Լեհաստանը միանշանակ կողմ է վիզային ռեժիմի ազատականացմանը։

«Այնուամենայնիվ, դա պետք է լինի ԵՄ անդամ բոլոր երկրների համատեղ որոշումը։ Այս պահին, իհարկե, Հայաստանում հավատարմագրված ոչ մի դեսպան չի կարող նման խոստում տալ։ Ժամկետների մասին դեռ խոսել չի կարելի։ Սակայն նշեմ, որ երկու տարի առաջ մենք, այնուամենայնիվ, իրականացրեցինք վիզային ռեժիմի ազատականացում Վրաստանի, Մոլդովայի եւ Ուկրաինայի քաղաքացիների համար։ Դա հնարավոր է նաեւ Հայաստանի քաղաքացիների համար, սակայն կոնկրետ ժամկետների մասին խոսել հնարավոր չէ, քանի որ դա շատ նուրբ հարց է»,- ասաց դիվանագետը։

Միաժամանակ նա հույս հայտնեց, որ Հայաստանի կառավարությանը, այնուամենայնիվ, կհաջողվի լուծել այս հարցը։