Եվրոպայում պատերազմի վտանգն այժմ զգալիորեն ավելի մեծ է, քան երբեւէ վերջին 30 տարվա ընթացքում, հայտարարել է Եվրոպայում անվտանգության եւ համագործակցության կազմակերպության (ԵԱՀԿ) նախագահ, Լեհաստանի արտգործնախարար Զբիգնեւ Ռաուն, փոխանցում է «Ինտերֆաքս»-ը։
«ԵԱՀԿ տարածքում պատերազմի վտանգն այժմ ավելի մեծ է թվում, քան երբեւէ վերջին 30 տարվա ընթացքում»,- ասել է Ռաուն ԵԱՀԿ Մշտական խորհրդի բացման ժամանակ:
«Այժմ անդամ երկրները կանգնած են խաղաղության եւ անվտանգության տարբեր մարտահրավերների առջեւ։ Երկարատեւ հակամարտությունները, ռազմական առճակատումը, արմատականացումը, ահաբեկչությունը, սպառազինությունների վերահսկման ռեժիմի թուլացման, COVID-19 համավարակի հետեւանքների, ինչպես նաեւ մարդու իրավունքների եւ հիմնարար ազատությունների խախտումների հետ միասին անորոշության, անկանխատեսելիության եւ վախի աճի են հանգեցնում մեր հասարակություններում»,- ընդգծել է նա։
Նա հայտարարել է, որ ԵԱՀԿ-ն, իր հերթին, պետք է կենտրոնանա Արեւելյան Եվրոպայում անվտանգության խնդիրների լուծմանն ուղղված ջանքերի վրա, մասնավորապես՝ Ուկրաինայի արեւելքում հակամարտության խաղաղ կարգավորման համար։
«Մենք բաց ենք լինելու երկխոսության համար եւ պատրաստ ենք նախաձեռնություններ ներկայացնել, որոնք ուղղված են փոխըմբռնմանը եւ լարվածության նվազեցմանը ԵԱՀԿ տարածաշրջանում։ (...) Մենք ցանկանում ենք հատուկ ուշադրություն դարձնել անվտանգության իրավիճակի բարելավմանը՝ նպաստելով տարածաշրջանային հակամարտությունների խաղաղ լուծման որոնմանը»,- ասել է Ռաուն։ «Մենք պետք է կենտրոնանանք Ուկրաինայի շուրջ հակամարտությունը խաղաղ ճանապարհով լուծելու վրա՝ Մինսկի համաձայնագրերին համապատասխան եւ հարգելով Ուկրաինայի ինքնիշխանությունը, տարածքային ամբողջականությունը եւ միասնությունը»,- ասել է նա։
«Արդեն մի քանի շաբաթ է, ինչ մենք բախվում ենք մեծ ռազմական էսկալացիայի հնարավորության հետ Արեւելյան Եվրոպայում։ Մենք վերջերս տեղեկացանք անվտանգության երաշխիքների պահանջների մասին, որոնք ԵԱՀԿ տարածքի կարեւոր մասն են կազմում»,- ասել է Ռաուն:
«Մենք անտարբեր չենք անդամ երկրների կողմից հնչեցված անվտանգության առարկությունների նկատմամբ: Ես հավատում եմ, որ ԵԱՀԿ-ն ճիշտ հարթակ է համապարփակ անվտանգության բոլոր ասպեկտների քննարկման համար»,- ընդգծել է նա։ Ընդ որում, նա նշել է, որ տարածաշրջանում հնարավոր ռազմական էսկալացիայի հետ կապված իրավիճակը «միջազգային գնահատական եւ պատշաճ արձագանք» է պահանջում։
Ավելի վաղ ԵՄ դիվանագիտության ղեկավար Ժոզեպ Բորելը նշել էր, որ ԵԱՀԿ-ն ԵՄ-ի եւ ՆԱՏՕ-ի հետ միասին առանցքային դերակատար է եվրոպական անվտանգության ապահովման գործում։
Ռուսաստանի Դաշնության արտաքին գործերի փոխնախարար Սերգեյ Ռյաբկովը Ռուսաստանի Դաշնության եւ ԱՄՆ-ի միջեւ բանակցությունների արդյունքներով ճեպազրույցում, իր հերթին, ասել է, որ անվտանգության երաշխիքների վերաբերյալ Վաշինգտոնի հետ հետագա շփումների մասին որոշում կկայացվի Ռուսաստանի եւ ՆԱՏՕ-ի միջեւ խորհրդակցությունների արդյունքներով եւ ԵԱՀԿ շրջանակներում։