Դեմարկացիայի և դելիմիտացիայի հարցով առաջարկներից որն է Բաքվի համար անընդունելի, հայկական կողմը հստակեցումներ դեռ չունի: Այս մասին այսօր՝ հունվարի 28-ին, «Եռաբլուր» պանթեոնում լրագրողների հետ զրույցում նշեց Հայաստանի ԱԳ նախարար Արարատ Միրզոյանը՝ հավելելով, որ հստակեցումներ դեռ չունեն, դրան ճշգրտման փուլում են:

Ճշտող հարցին՝ սպասո՞ւմ են ադրբեջանական կողմի առաջարկներին, թե՞ նոր առաջարկներ կներակայցնեն, Հայաստանի արտաքին քաղաքական գերատեսչության ղեկավարը պատասխանեց․ «Քննարկում անընդհատ կա, քննարկումը շարունակվում է։ Հիմա մենք փորձում ենք պարզաբանումներ ստանալ, թե հատկապես որ մասն է անընդունելի, ինչ հիմնավորմամբ, և, ըստ այդմ, ինչպիսի նոր լուծումներ կարող են լինել»։

Հիշեցնենք, որ հունվարի 19-ին ԱԺ-ում Արարատ Միրզոյանը հայտարարել էր. «Հայկական կողմը Հայաստան-Ադրբեջան սահմանագոտում իրավիճակի դեէսկալացիային, լարվածության նվազմանը, անվտանգության և կայունության մակարդակի բարձրացմանն ուղղված մի շարք միջոցառումների փաթեթ է նախապատրաստել և փոխանցել ինչպես ռուսական կողմին, այնպես էլ  ռուսական կողմի միջնորդությամբ՝ Ադրբեջանին, մյուս  գործընկերներին»։