Հայաստանում այո, կարող են երկու ընտրություններ լինել, բայց այն վարկանիշի պարագայում, որ այսօր ունի գործող վարչապետը եւ նրա թիմը, նրանք չեն գնա նախագահական ընտրությունների, որովհետեւ անգամ քաղաքապետի ընտրության հետ կապված ռիսկեր ունեին: Այս մասին NEWS.am-ի TALK TIME-ի տաղավարում նշեց քաղաքագետ Ալեն Ղեւոնդյանը:
«Չեն կարող այդքան փող բաժանել, այդքան վարչական ճնշման ենթարկել, որովհետեւ մարդկանց սառնարանները դատարկվում են, իսկ սոցիալական խնդիրներն ատելություն են ծնում: Իսկ ատելությունից դեպի գործողություն ճանապարհը կարճ է:
Ինչ վերաբերում է կառավարման ձեւի փոփոխությանը, ես վստահ եմ, որ Նիկոլ Փաշինյանն ուզում է նախագահ դառնալ, բայց այլ ճանապարհով՝ առանց ընտրությունների, որ ԱԺ-ն իրեն ընտրի: Բայց դրանից առաջ պետք է սահմանադրական հանրաքվե լինի, որովհետեւ լիազորությունների փոփոխություն պետք է տեղի ունենա, որտեղ նշվի, որ նախագահը ուժային եւ արտաքին քաղաքական բլոկի ղեկավարն է դառնում: կստեղծեն վարչապետի ինչ-որ մի պոստ, եւ ինքը կդառնա տնտեսության կառավարիչ: Այսինքն կլինի կիսանախագահական ձեւ, բայց խորհրդարանական փաթեթավորմամբ»,-ասաց նա՝ չբացառելով, որ կառավարման մոդելի փոփոխություն ընդհանրապես տեղի չունենա, քանի որ այս համակարգի պայմաններում իշխանություններն իրենց բոլոր խնդիրները կարողանում են լուծել:
