Ռուս-ուկրաինական հակամարտության սկսվելուց եւ Ռուսաստանի եւ Արեւմուտքի միջեւ պատժամիջոցային պատերազմից հետո Ռուսաստանի քաղաքացիների, այդ թվում՝ զբոսաշրջիկների հետաքրքրությունը Հայաստանի նկատմամբ կտրուկ աճել է։
Այս մասին NEWS.am-ի հետ զրույցում ասաց «Հայ զբոսավարների գիլդիա» ՀԿ փոխտնօրեն Լիա Բախշինյանը։ Նա հաստատեց, որ վերջին շաբաթվա ընթացքում՝ մարտի 2-ից, ակտիվացել է ռուսախոս զբոսաշրջիկների զբոսավարների աշխատանքը։
Նա ցավով նշեց, որ մարտի 9-ից ակտիվությունը կտրուկ կնվազի, քանի որ «Աերոֆլոտ»-ը կդադարեցնի թռիչքները դեպի Հայաստան, իսկ այն զբոսաշրջիկների խնդիրը, որոնք նախկինում մտադիր էին այցելել Հայաստան, կդժվարանա։
«Սա կհանգեցնի նրան, որ աշխատանքը նորից կակտիվանա, ապա անկում կսկսվի»,- հավելեց Բախշինյանը։
Նշենք, որ ռուսական բոլոր խոշոր ավիաընկերությունները դադարեցրել են միջազգային չվերթները, բացառությամբ՝ դեպի Մինսկ չվերթների։
Միաժամանակ, ռուսաստանցի զբոսաշրջիկների որոշակի հատված կարող է Հայաստան ժամանել հայկական ավիաընկերությունների չվերթներով։
«Սակայն դա փոքր-ինչ կփոխի իրավիճակը. գիդերը կաշխատեն շաբաթը մեկ անգամ։
Վերջին շաբաթվա ընթացքում զբոսաշրջային հոսքի աճը հիմնականում ոչ թե խմբակային է, այլ 2-3 մարդ։ Սակայն դա թույլ է տալիս զբոսավարներին էքսկուրսիաների պատվերներ ընդունել:
Որոշ գործակալություններ զբոսաշրջիկների թվի աճի հետ կապված արդեն բարձրացրել են տուրի գները մոտ 5000-8000 դրամով (10-15 դոլարով)։ Զբոսավարի ծառայությունների գները տատանվում են 15000-25000 դրամի սահմաններում (30-50 դոլար): 25000 դրամ արժեն այն էքսկուրսիաները, որոնք անցկացվում են առավոտից երեկո։
Համավարակի ժամանակ գները ինչ-որ պահի ընկան, բայց այժմ վերադարձել են 2019թ․ մակարդակին։
Ստեղծված իրավիճակում հնարավոր չէ ասել՝ արդյոք զբոսավարներին կապահովեն աշխատանքով, թե՝ ոչ, քանի որ դեպի Հայաստան չվերթների թիվը ներկայիս ցուցանիշի համեմատ կնվազի 70 տոկոսով։ Ավիատոմսերի գները կտրուկ աճել են։
Ամենաբարդ վիճակում են գերմանախոս, իտալախոս, իսպանախոս, ֆրանսախոս զբոսավարները, անգլախոսները երբեմն պատվերներ են ստանում, իսկ չինախոս եւ կորեախոս զբոսավարներն այժմ պահանջված են։
Ընդհանուր առմամբ, 2020թ․ ի վեր համավարակով եւ պատերազմով պայմանավորված իրավիճակը դեպի լավը չի փոխվել, ոլորտը չի վերականգնվել։ Զբոսավարների միայն 15 տոկոսն աշխատանք ունի, մնացածը գործազուրկ են, ինչը վատ է անդրադառնում նրանց որակավորման վրա։ Շատերը փոխում են իրենց պրոֆիլը եւ գնում այլ ոլորտներ»,- ընդգծեց փորձագետը։
