Չնայած Ուկրաինայի նախագահ Վլադիմիր Զելենսկու բազմաթիվ խնդրանքներին՝ Սպիտակ տունը չի աջակցում Ուկրաինայի օդում ոչ թռիչքային գոտու սահմանմանը կամ Ուկրաինայի ռազմաօդային ուժերին նոր կործանիչներ մատակարարելուն։ Այս մասին հայտարարել է Սպիտակ տան մամուլի քարտուղար Ջեն Փսակին։
«Ես կցանկանայի նշել, որ [Պենտագոնը] հայտարարել է, որ ինքնաթիռների մատակարարումը դժվար թե էապես փոխի Ուկրաինայի ռազմաօդային ուժերի արդյունավետությունը՝ համեմատած Ռուսաստանի հնարավորությունների հետ»,- ասել է Փսակին։ «Գնահատականն այն էր, որ այդ ինքնաթիռների տեղափոխումը կարող է սխալմամբ ընկալվել որպես էսկալացիա եւ հանգեցնել Ռուսաստանի լուրջ արձագանքի, եւ ռիսկի այդ գնահատականը չի փոխվել»:
Ոչ թռիչքային գոտու վերաբերյալ Փսակին ասել է, որ Բայդենը «որոշումները պետք է ազգային անվտանգության եւ գլոբալ անվտանգության շահերի տեսանկյունից դիտարկի, եւ նա առաջվա պես կարծում է, որ ոչ թռիչքային գոտին էսկալացիա կլինի ու կարող է պատերազմ հրահրել Ռուսաստանի դեմ»: «Չեմ կարծում, որ այս պահին Կապիտոլիումի բլրի վրա դրա շատ կողմնակիցներ կան, բայց մենք, իհարկե, հասկանում եւ ընդունում ենք, որ սա դեռեւս նախագահ Զելենսկու կոչն է»,- հավելել է նա:
Սպասվում է, որ չորեքշաբթի Զելենսկին առցանց ելույթ կունենա Կոնգրեսի համատեղ նիստում։ Երեքշաբթի ելույթ ունենալով Կանադայի Համայնքների պալատի առջեւ՝ Ուկրաինայի նախագահը լրացուցիչ ռազմական օգնություն է խնդրել եւ կոչ է արել Կանադային աջակցել Ուկրաինայի օդային տարածքի փակմանը։
