ԱՄՆ պաշտպանության փոխնախարար Քեթլին Հիքսը կարծում է, որ Շվեդիան եւ Ֆինլանդիան կկարողանան պայմանավորվել Թուրքիայի հետ՝ ՆԱՏՕ-ին իրենց անդամակցության շուրջ։
«Մենք կարծում ենք, որ Ֆինլանդիան եւ Շվեդիան կկարողանան ուղղակիորեն լուծել իրենց տարաձայնությունները թուրքական կողմի հետ»,- ասել է Հիքսը՝ Օսլոյում Նորվեգիայի պաշտպանության նախարար Բյորն Արիլդ Գրեհեմի հետ հանդիպման ժամանակ, փոխանցում է Reuters-ը նրա խոսքերը։
Ֆինլանդիան եւ Շվեդիան, ուկրաինական իրադարձությունների ֆոնին, ՆԱՏՕ-ի գլխավոր քարտուղար Յենս Սթոլթենբերգին են փոխանցել դաշինքին միանալու հայտերը։ Financial Times թերթը գրել է, որ Թուրքիան արգելափակել է ՆԱՏՕ մտնելու Ֆինլանդիայի եւ Շվեդիայի հայտերի քննարկման գործընթացի մեկնարկը։ Թուրքիայի նախագահ Թայիփ Էրդողանը հայտարարել է, որ Անկարան չի կարող «այո» ասել դաշինքին Ֆինլանդիայի եւ Շվեդիայի անդամակցությանը, քանի որ չի կարող հավատալ Թուրքիայում արգելված Քրդական աշխատավորական կուսակցության ներկայացուցիչների հետ հարաբերությունների վերաբերյալ նրանց հավաստիացումներին։
