Եվրամիության առաջնորդները Բրյուսելի գագաթաժողովում չեն կարողանա համաձայնության գալ ռուսական նավթի ներմուծման արգելքի շուրջ, ասել են նրանք ժամանելուն պես՝ հավելելով, որ հարցի շուրջ շաբաթների բանակցությունները դեռ չեն ավարտվել, հաղորդում է Reuters-ը:
«Մենք դեռ չենք հասել այս որոշմանը»,- ասել է Եվրահանձնաժողովի նախագահ Ուրսուլա ֆոն դեր Լյայենը: «Բայց ես վստահ եմ, որ դրանից հետո հնարավորություն կլինի»:
Էստոնիայի վարչապետ Կայա Կալլասը ասել է, որ ավելի իրատեսական է համաձայնությունը հաջորդ ամիս ակնկալել: «Չեմ կարծում, որ մենք այսօր համաձայնության կգանք։ Մենք կփորձենք համաձայնության գալ մինչեւ հունիսի գագաթաժողովը, սա առայժմ իրատեսական մոտեցում է»,- ասել է Կալլասը։
ԵՄ առաջնորդների հաջորդ գագաթաժողովը նախատեսված է հունիսի 23-24-ը։
Բելգիայի վարչապետ Ալեքսանդր դե Կրոոն ասել է, որ «սրանք հեշտ որոշումներ չեն»՝ հավելելով. «Ես կասկած չունեմ, որ առաջիկա օրերին, առաջիկա շաբաթներին որոշումները կկայացվեն»։
Քանի որ Հունգարիան ռուսական նավթի ներկրման արգելքի հիմնական հակառակորդն է, նրա վարչապետ Վիկտոր Օրբանը, ժամանելով ԵՄ գագաթաժողովին, հայտարարել է, որ նավթային էմբարգոյի հետ կապված գործերն այնքան էլ լավ չեն։