Ոչ բոլոր հայ արտահանողներն են տուժում դրամի արժեւորումից: Այս մասին Ազգային ժողովում հունիսի 15-ին 2021 թ. պետբյուջեի կատարողականի քննարկմանը, պատասխանելով պատգամավորների հարցերին, ասաց ՀՀ Կենտրոնական բանկի նախագահ Մարտին Գալստյանը:
Ավելի վաղ հայ արտահանողները հայտարարել էին, որ ազգային արժույթի ամրապնդման պատճառով վնասներ են կրում, եւ շուտով կարող են լուրջ խնդիրներ ունենալ։
Գալստյանը, մեկնաբանելով բիզնեսում առաջացած մտավախությունները, ընդգծեց, որ ազգային արժույթի հետ կապված իրավիճակը խնդիրներ է առաջացնում միայն առանձին վերցված արտահանման ոլորտներում։
«Ռուսական ռուբլու նկատմամբ հայկական դրամն արժեզրկվել է։ Ընդ որում, արժեզրկվել է ոչ միայն անվանական փոխարժեքը։ Արժեզրկում է տեղի ունենում նաեւ այն պատճառով, որ Ռուսաստանում գնաճը շատ ավելի բարձր է։ Այսինքն՝ Ռուսաստանի Դաշնություն արտահանող ընկերությունները, որոնց պայմանագրերը կնքվում են ռուբլով, այսօր միայն շահում են ստեղծված իրավիճակից, քանի որ հայկական դրամը շատ ավելի թույլ է, քան ռուսական ռուբլին»,- պարզաբանեց ԿԲ նախագահը։
Ընդ որում, ինչպես նշեց Գալստյանը, Եվրոպա արտահանող ընկերությունները եվրոյի արժեզրկման պատճառով անհամեմատ ավելի վատ վիճակում են հայտնվել:
«Եվրոպական արժույթն այս տարվա ընթացքում էժանացել է ոչ միայն մեր դրամի, այլեւ ԱՄՆ դոլարի նկատմամբ»,- ասաց ԿԲ նախագահը։
ԿԲ ղեկավարը դոլարի նկատմամբ դրամի արժեւորումը հիմնականում կապում է Ուկրաինայում իրադարձությունների, իսկ արդյունքում՝ օտարերկրյա այցելուների հոսքի ու արտաքին պահանջարկի ավելացման հետ։