Բացի Ռուսաստանից եւ Իրանից՝ Հայաստանը Հարավային Կովկասում այլ դաշնակիցներ չունի։ Այս մասին NEWS.am-ի թղթակցի հետ զրույցում ասաց ռուս լրագրող, ռազմական վերլուծաբան Պավել Ֆելգենգաուերը։
Հայերը, ինչպես նշեց լրագրողը, «բացարձակ չպետք է ուրախանան» ԿՀՎ ղեկավարի այցից։ Սա, նրա խոսքով, բավականին վատ նշան է։
«Նա Մոսկվա եկավ պատերազմից առաջ․․․Նրա այցը վատ նշան է։ Սա բարեկամական այց չէ։ Սա կարող է լինել Հայաստանի համար վերջին զգուշացումը»,- պարզաբանեց Ֆելգենգաուերը։
Ինչպես նշեց փորձագետը, խնդիրը Հայաստանում չէ։ Խոսքը, ըստ նրա, Իրանի եւ Ռուսաստանի հետ առճակատման մասին է, որոնք «կարծես վաղը դաշինք կկնքեն, որը, ընդհանուր առմամբ, լրջորեն կազդի Մերձավոր Արեւելքի ողջ իրավիճակի վրա, եւ, ընդհանրապես, Անդրկովկասի վրա»։
«Չարժե ուրախանալ ԿՀՎ ղեկավարի այցով։ Նա ճանապարհորդում է միայն այն ժամանակ, երբ սովորական դիվանագիտական ուղիներն այլեւս չեն աշխատում։ Նա գնահատական է տալիս։ Նա եկավ Մոսկվա եւ, ըստ երեւույթին, գնահատեց, որ պատերազմն անխուսափելի է։ Համապատասխանաբար, հարաբերությունները սկսեցին կտրուկ վատթարանալ»,-ասաց նա՝ զգուշացնելով, որ Վաշինգտոնը կարող է Երեւանը ներառել նույն ճամբարում, ինչ Իրանը, Ռուսաստանի Դաշնությունը եւ Բելառուսը:
Հետագայում, ըստ փորձագետի, ԱՄՆ-ն կսկսի ամրապնդել հարաբերությունները Ադրբեջանի, եւ, ըստ ամենայնի, Թուրքիայի հետ, «որովհետեւ Թուրքիան, իհարկե, ավելի կարեւոր է, քան ցանկացած Հայաստան տարածաշրջանային իրավիճակում»։
Ֆելգենգաուերը մեկնաբենց նաեւ Հայաստանի եւ Ադրբեջանի արտգործնախարարների երկկողմ հանդիպումը։ Ռուսաստանցի լրագրողի կարծիքով՝ նման հանդիպումների մեջ վատ բան չկա։
«Դրանում ոչ մի վատ բան չկա։Ընդհանրապես, դժվար է պատկերացնել, թե ինչ կարող են նրանք հայտնվել, քանի որ Ադրբեջանի դիրքորոշումը հայտնի է։ Սա Լեռնային Ղարաբաղի լիակատար ապառազմականացում է, իսկ իրականում նրա լիկվիդացում, եւ տարածաշրջանի վերադարձ Ադրբեջանին։ Հայ բնակչությունը կամ վերցնում է ադրբեջանական անձնագրեր, եթե կարող է ապացուցել, որ դրա իրավունքն ունի, կամ դուրս է գալիս այնտեղից։ Ինձ համար դժվար է պատկերացնել Երեւանում որեւէ իշխանություն, որը կհամաձայնի նման պայմաններին։ Իսկ Ադրբեջանը, ընդհանուր առմամբ, համաձայն չէ մյուսների հետ։ Ռուսաստանը հիմա այնքան էլ Անդրկովկասում չէ տարբեր պատճառներով։ Նրա ազդեցությունն այնտեղ թուլանում է, քանի որ բոլոր ուժերը կենտրոնացած են այլուր։ Հետեւաբար, Հայաստանի համար բավական դժվար կլինի այնտեղ գոյություն ունենալ եւ ինչ-որ կերպ դիմանալ։ Հայաստանում իրավիճակը շատ ծանր է։ Ռազմական հնարավորություններ չկան, դիվանագիտական հնարավորությունները չափազանց սահմանափակ են։ Պետք է ինչ-որ կերպ պահպանել իրավիճակը՝ պահպանելով ստատուս քվոն այնպես, ինչպես կա այսօր, եւ ակնկալել, որ ապագայում, գուցե, ինչ-որ բան փոխվի դեպի լավը»,-եզրափակեց Ֆելգենգաուերը։
