Եվրահանձնաժողովն անհանգստությամբ է հետեւում Կոսովոյի հյուսիսում տեղի ունեցող իրադարձություններին, ԵՀ-ում կարծում են, որ միակողմանի բոլոր միջոցները, որոնք խանգարում են քաղաքացիների ազատ տեղաշարժին, պետք է անհապաղ չեղարկվեն, ասել է Եվրահանձնաժողովի ներկայացուցիչ Պետեր Ստանոն ճեպազրույցում։
«Եվրամիությունը եւ անդամ երկրները հետեւում են իրադարձություններին, հատկապես հյուսիսային Կոսովոյում, շատ ուշադիր եւ անհանգստությամբ... Բոլորը, ովքեր ներգրավված են այդ իրադարձություններում, պետք է հանգիստ մնան։ Ցանկացած չհամակարգված եւ միակողմանի գործողություն, որոնք վտանգի կարող են ենթարկել կայունությունն ու անվտանգությունը տեղում, եւ որոնք խոչընդոտում են բոլոր քաղաքացիների ազատ տեղաշարժին, պետք է անհապաղ դադարեցվեն։ Ցանկացած վեճի լուծման միակ տարբերակը երկխոսությունն է»,- ասել է նա։
Կիրակի երեկոյան եւ երկուշաբթի գիշերը Կոսովոյի հյուսիսում տեղի են ունեցել անկարգություններ Պրիշտինայի կողմից սերբական համարանիշներով եւ փաստաթղթերով մեքենաների մուտքի պլանավորված արգելքի պատճառով, որը պետք է ուժի մեջ մտներ օգոստոսի 1-ին։
Կիրակի լույս երկուշաբթի գիշեր Եվրամիության դիվանագիտության ղեկավար Ժոզեպ Բորելն իր Թվիթերում գրել է, որ ողջունում է Կոսովոյի որոշումը՝ մինչեւ սեպտեմբերի 1-ը միջոցները հետաձգելու մասին, եւ սպասում է, որ ճանապարհների բոլոր պատնեշները անհապաղ կհանվեն։