Երեւանում եւ Բաքվում ԱՄՆ դեսպանատները հարկ են գտել կրկնել ՀՀ եւ ԱՀ արտգործնախարարների հետ ԱՄՆ պետքարտուղարի՝ Եվրոպայի եւ Եվրասիայի հարցերով տեղակալ Քերըն Դոնֆրիդի զրույցի մասին հաղորդագրությունը։
Հիշեցնենք, որ նախօրեին հաղորդվել է Դոնֆրիդի եւ Հայաստանի ու Ադրբեջանի արտգործնախարարների հեռախոսազրույցի մասին, սակայն այսօր ԱՄՆ դեսպանատները կրկին մեկնաբանել են հեռախոսազրույցի բովանդակությունը։
«ԱՄՆ պետքարտուղարի տեղակալ Դոնֆրիդը երեկ հեռախոսազրույց է ունեցել Հայաստանի արտգործնախարար Միրզոյանի եւ Ադրբեջանի արտգործնախարար Բայրամովի հետ։ Նրանք քննարկել են տարածաշրջանում խաղաղություն հաստատելու Հայաստանին ու Ադրբեջանին տրված պատմական հնարավորությունը։ Պետքարտուղարի տեղակալը վերահաստատել է Միացյալ Նահանգների առաջարկը՝ օգնելու բացել տարածաշրջանային տրանսպորտային ուղիները։ Նա կողմերին կոչ է արել թուլացնել լարվածությունը սահմանին եւ շարունակել երկխոսությունը»,-ասվում է Երեւանում ԱՄՆ դեսպանատան հաղորդագրության մեջ։ Նմանատիպ հաղորդագրություն է տարածել Բաքվում ԱՄՆ դեսպանատունը։
