Էլեկտրաէներգիայի եվրոպական գները նոր ռեկորդների են հասնում, քանի որ ջերմային ալիքը սահմանափակում է էներգիայի մատակարարումները, իսկ ամբողջ Ֆրանսիայով անտառային հրդեհներ են մոլեգնում, գրում է Bloomberg-ը։
Գների աճն արտացոլում է բնական գազի սահմանափակ շուկան, որն օգտագործվում է էլեկտրակայանների վառելիքի համար, քանի որ Ռուսաստանը կրճատում է մատակարարումները, մինչդեռ Եվրոպան աշխատում է ձմռան համար պաշարների համալրման ուղղությամբ: Միջուկային ռեակտորների հզորության անկումը, ինչպես նաեւ թույլ քամին եւ հիդրոէներգետիկան սրել են ճգնաժամը՝ մեծացնելով պահանջարկի նվազեցմանն ուղղված միջամտության հավանականությունը:
«Եթե Ռուսաստանը դադարեցնի գազի մատակարարումը եւ այն կարող է բավարար չլինել ամբողջ պահանջարկը բավարարելու համար, ապա նորմավորում կներդրվի»,- Bloomberg Television-ին ասել է Եվրոպական էներգետիկ կարգավորողների խորհրդի նախագահ Անեգրեթ Գրոբելը: Անջատումներից «կարելի է խուսափել, բայց դա, իհարկե, մեծ նախապատրաստական աշխատանք է պահանջում, որը մենք հիմա անում ենք»։
Հաջորդ տարվա համար գերմանական էներգետիկայի հենանիշն աճել է 6.6 տոկոսով՝ European Energy Exchange AG-ում հասնելով ռեկորդային 455 եվրոյի մեկ ՄՎտժ-ի համար: Ֆրանսիական պայմանագիրն աճել է 7.8 տոկոսով եւ կազմել 622 եվրո մեկ ՄՎտ/ժ-ի համար: Դա մոտավորապես 1100 դոլար է մեկ բարել նավթի էներգիայի համարժեքի համար:
Ջերմային ալիքներն այս ամառ մեծացրել են պահանջարկը՝ սրելով խափանումները մատակարարման մեջ, քանի որ հիմնական ջրային ուղիները, որոնք օգտագործվում են հիդրոէլեկտրաէներգիայի արտադրության, ատոմակայանների սառեցման եւ էներգակիրների մատակարարման համար, չորանում են:
Ֆրանսիան հատկապես ծանր վիճակում է, քանի որ երկրի միջուկային ոլորտի կեսից ավելին անջատված է տեխնիկական սպասարկման համար: Սովորաբար երկիրը արտահանում է էլեկտրաէներգիան, սակայն այս տարի այն նետտո-ներմուծող դարձավ՝ ստիպելով հարեւան երկրներին ավելի շատ գազ վառել։ Ամբողջ երկրով մեկ մոլեգնում են անտառային հրդեհները, ինչը նախագահ Էմանուել Մակրոնին դրդել է աջակցություն ստանալ ամբողջ Եվրոպայից՝ կրակի դեմ պայքարելու համար:
«Ատոմային էներգիայի արտադրության պատմական ցածր մակարդակը եւ հիդրոէներգիայի պաշարների ցածր մակարդակն ամբողջ Եվրոպայում առաջարկի դեֆիցիտի են հանգեցնում, որը կարող է լրացվել միայն կառավարելի աղբյուրներից, ինչպիսիք են ածուխը եւ գազը,- ասել է Bloomberg Intelligence-ի վերլուծաբան Պատրիսիո Ալվարեսը:- Դա մեծացնում է գազի պահանջարկի դիմադրողականությունը Ռուսաստանից մատակարարումների կրճատման ֆոնին»:
Էլեկտրաէներգիայի մատակարարման խափանումների պատճառով Մեծ Բրիտանիան նախազգուշացմամբ է հանդես եկել առաջարկի եւ պահանջարկի միջեւ նեղ տարբերության մասին: Մինչ National Grid ESO-ն՝ երկրի ցանցային օպերատորը, հայտարարել է, որ արտադրությունը բավարար կլինի, դա դժվարությունների եւս մի նշան է, որոնց բախվել է Եվրոպայի էլեկտրաէներգետիկ համակարգն այս տարի:
