ՀԱՊԿ-ում ՌԴ դաշնակիցների շփումները ոչ բարեկամ երկրների հետ չպետք է վնաս հասցնեն Մոսկվայի հետ գործընկերությանը, հայտարարել է ՌԴ ԱԳՆ մամուլի վարչության փոխտնօրեն Իվան Նեչաեւը «Մարտական եղբայրություն-2022» օպերատիվ-ռազմավարական զորավարժությունների նախօրեին, հայտնում է «ՌԻԱ Նովոստին»։
«Մենք ելնում ենք նրանից, որ Ռուսաստանին ոչ բարեկամ երկրների հետ շփումները չպետք է վնաս հասցնեն մեր երկրի հետ ռազմավարական գործընկերությանը, չհակասեն ընդհանուր միությունների, այդ թվում՝ ՀԱՊԿ-ի եւ ԵԱՏՄ-ի, ԱՊՀ-ի եւ ՇՀԿ-ի համաձայնագրերով ստանձնած պարտավորություններին»,- ասել է դիվանագետը ՌԴ ԱԳՆ ամենշաբաթյա ճեպազրույցում։
Նա նաեւ պատմել է Ղազախստանի, Ղրղըզստանի եւ Տաջիկստանի տարածքում «Մարտական եղբայրություն-2022» օպերատիվ-ռազմավարական զորավարժությունների շրջանակում ՀԱՊԿ հավաքական ուժերի առաջիկա լայնածավալ զորավարժությունների մասին։ «Դրանք (զորավարժությունները – խմբ.) կնպաստեն Կենտրոնական Ասիայում անվտանգության եւ կայունության ապահովմանը»,- նշել է դիվանագետը։