Microsoft-ը կփոխի նախորդ սերնդի Windows օպերացիոն համակարգի տեղադրման պահանջները։ Այս մասին տեղեկացրել է Neowin պարբերականը։

Windows 10-ի համակարգային թարմացված պահանջների վրա ուշադրություն է դարձրել Թվիթերի XenoPanther մականունով օգտատերը։ Նա ուսումնասիրել է 21 327 տարբերակի համակարգային ֆայլերը եւ հայտնաբերել, որ դրա տեղադրումը կարող է անհնար լինել՝ առանց Trusted Platform Module (TPM) կրիպտոգրաֆիկ մոդուլի։ Նա ասել է, որ այդ կերպ Microsoft-ը դժվարացրել է օպերացիոն համակարգի տեղադրումը։

Մինչ այդ TPM-ի առկայությունը պարտադիր էր Windows 11-ի տեղադրման համար։ Մասնագետների կարծիքով՝ Windows 11-ի խստացված պահանջները բարդացնում էին օպերացիոն համակարգի տեղադրումը։ Այս մոդուլը կարող էր չլինել անգամ ժամանակակից համակարգիչներում։ Ավելի ուշ Microsoft-ում բացատրել են, որ TPM-ի առկայությունը նկատելիորեն բարձրացնում է համակարգի անվտանգության մակարդակը։

XenoPanther-ը նշել է, որ թարմացված պարամետրերը նկատվել են appraiserres.dll համակարգային ֆայլում։ Մասնագետի խոսքով՝ առանց TPM-ի Windows 10-ի տեղադրումը կարելի է, եթե հեռացվի այդ ֆայլը։