Այսօր Հայաստանում կարեւոր օրենսդրական փոփոխություններ են տեղի ունենում հեռուստատեսության եւ ռադիոյի ոլորտում։ Այս մասին ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստում ՀԴՀ անդամի ընտրության հարցի քննարկման ժամանակ ասաց այդ պաշտոնի միակ թեկնածու, ՀՌՀ գործող նախագահ Տիգրան Հակոբյանը։
«Աուդիովիզուալ մեդիայի ոլորտը չի կարող կարգավորվել առանձին օրենքներով»,-ասաց Հակոբյանը։
Նրա խոսքով՝ կան խնդիրներ, որոնք գործող օրենսդրությամբ չեն լուծվում։ Առաջին հերթին դա պայմանավորված է տեխնոլոգիաների արագ զարգացմամբ։
«Այն, ինչ երեք տարի առաջ անլուծելի էր, այսօր բավականին լուծելի է։ Այնուամենայնիվ, կան անհավասար մրցակցային պայմաններ դասական եւ նոր լրատվամիջոցների միջեւ։ Տեխնոլոգիական հեղափոխության արդյունքում համացանցում հայտնվեցին նոր հեռարձակողներ, որոնց լսարանը երբեմն շատ ավելի մեծ է։ Սա հանգեցնում է որոշակի անհամաչափության: Հեռուստատեսության լսարանը նվազում է։ Պետք է հստակ իրավական նորմեր սահմանել նոր եւ ավանդական լրատվամիջոցների համար»,-պարզաբանեց Հակոբյանը։