Վերաքննիչ քաղաքացիական դատարանը մերժել է Դանիել Իոաննիսյանն ընդդեմ Արսեն Բաբայանի՝ պատվին եւ արժանապատվությանը պատճառված վնասի հատուցման պահանջի մասին գործով միջանկյալ որոշման դեմ բերված բողոքը։ Այս մասին NEWS.am–ը տեղեկացավ Դատալեքս դատական-տեղեկատվական համակարգից։
Հայցը քննվել է գրավոր ընթացակարգով:
«Հայցի ապահովման միջոց կիրառելու վերաբերյալ միջնորդությունը մերժելու մասին» վերտառությամբ որոշման դեմ Դանիել Իոաննիսյանի հայցը քննվել է գրավոր ընթացակարգով:
Վերաքննիչ դատարանն արձանագրել է, որ «Հայցի ապահովման միջոց կիրառելու վերաբերյալ միջնորդությունը մերժելու մասին» որոշման մեջ դատարանի պատճառաբանությունները բավարար են Հայցվորի միջնորդության ոչ իրավաչափ լինելու հանգամանքի հաստատման համար:
Վերոգրյալի հիման վրա Վերաքննիչ դատարանը գտնում է, որ Իրոաննիսյանի կողմից բերված վերաքննիչ բողոքի հիմքերն ու հիմնավորումները հիմնավոր և բավարար չեն արձանագրելու, որ առաջին ատյանի դատարանը թույլ է տվել դատավարական իրավունքի նորմերի այնպիսի խախտում կամ սխալ կիրառում, որը հանգեցրել է կամ կարող էր հանգեցնել հայցի ապահովման միջոցի կիրառման հարցի սխալ լուծման:
Հետեւաբար, դատարանը որոշել է մերժել վերաքննիչ բողոքը` որոշումը թողնելով օրինական ուժի մեջ։
Որոշումն օրինական ուժի մեջ է մտնում կայացման պահից և բողոքարկման ենթակա չէ:
Հիշեցնենք, որ Իրազեկ քաղաքացիների միավորում ՀԿ նախագահ Դանիել Իոաննիսյանը դատական հայց էր ներկայացրել «Հայրենիք» կուսակցության խորհրդի անդամ Արսեն Բաբայանի դեմ՝ պատվին եւ արժանապատվությանը պատճառված վնասի հատուցման պահանջով։
