Հունվարին «Միջուկային գիտնականների տեղեկագրի» ղեկավարները երրորդ տարին անընդմեջ հայտարարել են, որ աշխարհը «կործանման եզրին է»։ Նրանք ասել են, որ Դատաստանի օրվա ժամացույցը կանգնած է կեսգիշերից 100 վայրկյան առաջ, որը աղետին ամենամոտ պահն է 1947 թվականին ժամացույցի ստեղծումից ի վեր:
Բայց դա եղել է ավելի քան ութ ամիս առաջ՝ Ուկրաինայում պատերազմից առաջ եւ Հյուսիսային Կորեայի կողմից բալիստիկ հրթիռների վերջին փորձարկումներից առաջ: Հյուսիսային Կորեան վերջին երկու շաբաթվա ընթացքում վեց նման արձակում է իրականացրել։
«Ինչ վերաբերում է «Դատաստանի օրվա ժամացույցին», այն չի արձագանքում յուրաքանչյուր վտանգավոր միջադեպի կամ նույնիսկ դրական իրադարձության»,- Yahoo News-ին ասել է տեղեկագրի Գիտության եւ անվտանգության խորհրդի համանախագահ Շերոն Սքվասոնին: «Բայց, անշուշտ, վերջին տարվա ընթացքում եղել են որոշ իսկապես անհանգստացնող զարգացումներ, եւ դրանց մեծ մասը կապված է Ուկրաինա Ռուսաստանի ներխուժման հետ»:
Երեքշաբթի օրը Հյուսիսային Կորեայի կողմից արձակված միջին հեռահարության բալիստիկ հրթիռներից մեկը թռել է հյուսիսային Ճապոնիայի վրայով՝ խուճապ առաջացնելով բնակիչների շրջանում, որոնք արթնացել են ազդանշաններից եւ նախազգուշական հաղորդագրություններից։ Սա Ճապոնիայի վրա արձակված առաջին հրթիռն էր վերջին հինգ տարում, ինչի պատճառով ԱՄՆ-ը ՄԱԿ-ի Անվտանգության խորհրդի նիստ էհրավիրել:
«Միջուկային գիտնականների տեղեկագրի» անդամները պետք է հանդիպեն հաջորդ ամիս, որպեսզի քննարկեն անցյալ տարվա հետեւանքները, եւ, հավանաբար, ժամացույցը կարող են նույնիսկ ավելի մոտեցնել կեսգիշերին:
