ՌԴ պաշտպանության նախարար Սերգեյ Շոյգուն Ուկրաինայում ռուսական զորքերի նոր հրամանատար է նշանակել։ Այս մասին գրառում է կատարել բանակի գեներալ Սերգեյ Սուրովիկինը։ 2017 թվականից նա գլխավորել է Ռուսաստանի օդատիեզերական ուժերը, իսկ հատուկ գործողության ընթացքում ղեկավարել է «Հարավ» խմբավորումը, որը հունիսին գրավել է Լուգանսկի շրջանի Սեւերոդոնեցկը։
Ռուսաստանի Դաշնության պաշտպանության նախարարությունն առաջին անգամ հրապարակավ հայտարարել է ներխուժման ուժերի հրամանատարի նշանակման մասին։ Նախկինում հնչել են միայն զորքերի խմբավորումների հրամանատարների անունները։
Ինչո՞վ է հայտնի Ուկրաինայում ռուսական բանակի հրամանատարը։ Սերգեյ Սուրովիկինը, որն այժմ 55 տարեկան է, ծառայել է հատուկ նշանակության ստորաբաժանումներում, այդ թվում՝ Աֆղանստանում: 1991 թվականի օգոստոսի հեղաշրջման ժամանակ հենց կապիտան կոչումով 24-ամյա Սուրովիկինն էր ղեկավարում 2-րդ գվարդիական Թամանյան մոտոհրաձգային դիվիզիայի գումարտակը, որը փորձում էր ճեղքել Սադովոյե կոլցոյի եւ Նովի Արբատի խաչմերուկի բարիկադները։ Բախման ընթացքում զոհվել էին երեք ցուցարարներ՝ Դմիտրի Կոմարը, Իլյա Կրիչեւսկին եւ Վլադիմիր Ուսովը։ Պուտչիստների արագ պարտությունից հետո նրանք հետմահու Խորհրդային Միության հերոսի կոչում ստացան։ Սուրովիկինը մի քանի ամիս անցկացրեց կալանքի տակ, սակայն քաղաքացիների մահվան մեղադրանքը ի վերջո հանվեց նրա վրայից (Մոսկվայի դատախազությունը որոշել էր, որ նա «կատարել է հրամանատարության հրամանները»):
Սերգեյ Սուրովիկինը մասնակցել է Տաջիկստանի զինված հակամարտությանը եւ երկրորդ չեչենական պատերազմին։ Չեչնիայի ղեկավար Ռամզան Կադիրովը գրել է, որ անձամբ ծանոթ է եւ լավ ճանաչում է Սուրովիկինին գրեթե 15 տարի։ Կադիրովն ասել է, որ «զորքերի միացյալ խումբն այժմ ապահով ձեռքերում է» եւ վստահություն է հայտնել, որ Սուրովիկինը ճակատում «իրավիճակը դեպի լավը կփոխի»։
