Եվրախորհրդարանը Հայաստանին կոչ է անում «դիվերսիֆիկացնել գործընկերությունը անվտանգության ոլորտում»։
Փաստաթղթում նշվում է, որ «Ռուսաստանի ռազմական ագրեսիան Ուկրաինայի դեմ իր հետեւանքներն է ունեցել Հարավային Կովկասի համար եւ էլ ավելի բարդացրել անվտանգության հետ կապված իրավիճակը տարածաշրջանում»։
Նշվում է, որ «Հայաստանի եւ Ադրբեջանի միջեւ կայուն խաղաղության հնարավոր չէ հասնել ռազմական ճանապարհով» եւ անհրաժեշտ է «համապարփակ քաղաքական կարգավորում՝ միջազգային իրավունքին համապատասխան, ներառյալ՝ ՄԱԿ-ի Կանոնադրությամբ ամրագրված սկզբունքները, 1975 թվականի ԵԱՀԿ Եզրափակիչ Հելսինկյան ակտը եւ 2009 թվականի ԵԱՀԿ ՄԽ հիմնարար սկզբունքները»։
Զեկույցում խստորեն դատապարտվում է «2022 թվականի սեպտեմբերին Ադրբեջանի կողմից իրականացված լայնածավալ ռազմական հարձակումը Հայաստանի ինքնիշխան տարածքի վրա եւ դրա հետեւանքները խաղաղ գործընթացի վրա»։
«Հայաստանի եւ Ադրբեջանի տարածքային ամբողջականությունը պետք է լիովին հարգվի։ Երեւանին եւ Բաքվին կոչ ենք անում ամբողջությամբ իրականացնել 2020 թվականի նոյեմբերի 9-ի եռակողմ համաձայնագիրը եւ հրատապ միջոցներ ձեռնարկել՝ նախապատրաստելու իրենց բնակչությանը խաղաղ գոյակցությանը։ Ադրբեջանի իշխանությանը կոչ ենք անում խուսափել հռետորաբանությունից, որը սպառնում է խաթարել խաղաղ գործընթացը։
Աջակցություն ենք հայտնում Եվրոպական խորհրդի նախագահ Շառլ Միշելի նախաձեռնությունը՝ Հայաստանի եւ Ադրբեջանի ղեկավարների միջեւ Բրյուսելում երկկողմ հանդիպումներ հրավիրելու կապակցությամբ»,-ասվում է զեկույցում։
Փաստաթուղթը ողջունում է նաեւ ԵՄ-ի քաղաքացիական առաքելություն տեղակայելու համաձայնությունը՝ վստահություն ձեւավորելու եւ սահմանային հանձնաժողովների աշխատանքը հեշտացնելու համար, մարդասիրական օգնությունը, որը տրամադրվում է ԵՄ-ի կողմից Լեռնային Ղարաբաղում եւ նրա շրջակայքում հակամարտությունից տուժած բնակչությանը։
Նշվում է, որ ԵՄ-ն շարունակում է մտահոգված լինել հակամարտության ընթացքում եւ դրանից հետո Ադրբեջանի կողմից գերեվարված հայ ռազմագերիների, ինչպես նաեւ զինվորական, քաղաքացիական այլ անձանց ճակատագրով, եւ ողջունում է նրանցից մի քանիսի վերադարձը հայրենիք։
Բացի այդ, դատապարտվում են ադրբեջանական զինուժի կողմից հայ զինվորականների խոշտանգումները, անդամահատումը եւ սպանությունը պատկերող կադրերը, որոնց կապակցությամբ փաստաթղթում կոչ է արվում ամբողջական եւ անաչառ հետաքննություն անցկացնել՝ բացահայտելու եւ պատասխանատվության ենթարկելու մեղավորներին։
Եվրախորհրդարանը «խստորեն կոչ է անում ձեռնպահ մնալ մշակութային, կրոնական կամ պատմական ժառանգության ոչնչացումից, կոչ է անում վերականգնել վնասված հուշարձանները՝ ՅՈՒՆԵՍԿՕ-ի չափանիշներին եւ ուղեցույցներին համապատասխան, թույլ տալ ՅՈՒՆԵՍԿՕ-ի առաքելությանը հնարավորինս արագ այցելել երկու երկրներ՝ առանց նախապայմանների»։
Կոչ է արվում նաեւ ընդլայնել երկկողմ շփումները։
Փաստաթուղթը աջակցություն է հայտնում Հայաստանի եւ Թուրքիայի միջեւ հարաբերությունների կարգավորմանը եւ ողջունում «ձեռք բերված առաջընթացը», որի կապակցությամբ կողմերին կոչ է արվում «արագ կատարել հատուկ ներկայացուցիչների ձեռք բերված պայմանավորվածությունները»։
Հայաստանին նաեւ կոչ է արվում «դիտարկել անվտանգության ոլորտում իր գործընկերության դիվերսիֆիկացումը, քանի որ Ռուսաստանի եւ ՀԱՊԿ-ի գծով դաշնակիցների վրա նրա երկարամյա ապավինումն անբավարար է»:
