ԵՄ-ն արձագանքել է Իլոն Մասկի կողմից Twitter-ի գնմանը։
«Եվրոպայում թռչունը կթռչի մեր կանոններով»։ Այսպես է արձագանքել Ներքին շուկայի հարցերով եվրահանձնակատար Թիերի Բրետոնը՝ անդրադառնալով Իլոն Մասկի՝ «Թռչունն ազատ է» թվիթին, որը նա արել է Twitter-ի ձեռքբերման գործարքի ավարտից հետո։
Մասկը խոստացել է, որ հարթակը չի դառնա «դժոխք, որտեղ դուք կարող եք որեւէ բան ասել առանց հետեւանքների»։
Բրետոնի թվիթն ուղեկցվել է DSA հեշթեգով՝ հղում կատարելով թվային ծառայությունների մասին օրենքին, որը թվային ծառայությունների մատակարարներից պահանջում է անհապաղ միջոցներ ձեռնարկել անօրինական կոնտենտի դեմ, ինչպես օրինակ ատելության հրահրումն է։
Բրետոնը նաեւ Twitter-ում տեսանյութ է հրապարակել, որտեղ ինքն ու Իլոն Մասկը քննարկել են թվային ծառայությունների մասին օրենքը: