Ածուխն առնվազն մինչեւ 2040 թ․ կարեւոր դեր կխաղա Հնդկաստանում նույնիսկ այն դեպքում, երբ Եգիպտոսում ՄԱԿ-ի կլիմայի շուրջ անցկացվող բանակցություններում գնալով ավելի ու ավելի շատ են հնչում ավելի մաքուր վառելիքի անցնելու կոչեր, ասել է երկրի ածխի նախարարը, հայտնում է Reuters-ը:
Ելույթ ունենալով խորհրդարանական հանձնաժողովի առջեւ՝ ածխի նախարար Պրալհադ Ջոշին ասել է, որ վառելիքը էներգիայի մատչելի աղբյուր է, եւ դրա պահանջարկը Հնդկաստանում դեռ չի հասել իր գագաթնակետին:
«Հետեւաբար, տեսանելի ապագայում Հնդկաստանում ածխից հրաժարում չի լինի»,- ասել է Ջոշին՝ հավելելով, որ այն մեծ դեր կխաղա մինչեւ 2040 թվականը եւ դրանից հետո:
COP27 գագաթաժողովում ՄԱԿ-ի գլխավոր քարտուղար Անտոնիո Գուտերեշը կոչ է արել արտանետումները նվազեցնելու հրատապ միջոցներ ձեռնարկել, ներառյալ մինչեւ 2040 թվականը ամբողջ աշխարհում ածխից հրաժարվելը:
Հնդկաստանը երկար ժամանակ դիմադրել է ածխից հրաժարվելուն: Էլեկտրակայաններում վառելիքի պաշարների կրճատման ամիսներն ապրիլին ավարտվել են ավելի քան վեց տարվա ամենավատ էներգետիկ ճգնաժամով, որը խաթարել է արդյունաբերական գործունեությունը եւ ստիպել է Հնդկաստանին արագացնել ածխի արդյունահանումը:
Քանի որ շոգը մեծացնում է օդորակիչների օգտագործումը եւ ավելացնում էլեկտրաէներգիայի պահանջարկը, կառավարությունը հայտարարել է, որ ածուխը կազմում է Հնդկաստանի առաջնային էներգիայի կարիքների ավելի քան 51 տոկոսը եւ էլեկտրաէներգիայի արտադրության մոտ 73 տոկոսը:
