Քուվեյթում յոթ բանտարկյալների մահապատժի են ենթարկել։ Պետական լրատվական KUNA գործակալությունը հաղորդում է, որ բոլոր մահապատժի ենթարկվածները դատապարտվել են դիտավորյալ սպանության եւ այլ հանցագործությունների համար։ Նրանց թվում են երեք քուվեյթցի տղամարդիկ, մեկ քուվեյթցի կին, սիրիացի, պակիստանցի եւ եթովպացի։
Քուվեյթը հայտնել է, որ մահապատիժներն իրականացվել են կենտրոնական բանտում, հայտնում է AP-ն։
«Նրանք զոհերին զրկել են այս աշխարհում իրենց ամենասուրբ իրավունքից՝ կյանքի իրավունքից»,- ասվում է Քուվեյթի դատախազության հայտարարության մեջ։
Քուվեյթում մահապատիժներ չեն իրականացվել 2017 թվականից, երբ նմանատիպ զանգվածային մահապատիժ իրականացվեց յոթ բանտարկյալների, այդ թվում՝ իշխող ընտանիքի անդամի նկատմամբ։
Եվրամիությունը անմիջապես քննադատել է մահապատիժները, որոնք, նրա խոսքով, համընկել են Եվրահանձնաժողովի պաշտոնական ներկայացուցիչ Մարգարիտիս Շինասի այցի հետ։
Շինասն իր հայտարարության մեջ հատուկ զգուշացրել է, որ դա «հետեւանքներ կունենա Քուվեյթն առանց վիզայի ցուցակում ներառելու առաջարկի քննարկման ժամանակ»: Եվրախորհրդարանը հինգշաբթի օրը պետք է քվեարկեր ԵՄ-ում Քուվեյթի եւ հարեւան Կատարի բնակիչների համար վիզային ռեժիմը վերացնելու առաջարկի շուրջ։ ԵՄ-ն առանձին պլանավորել է Քուվեյթի դեսպանին Բրյուսել կանչել։