Վարչապետ Նիկոլ Փաշինյանը Ֆինանսների նախարարի տեղակալներին, նախարարության մեկ այլ պաշտոնյայի ու Տարածքային կառավարման եւ ենթակառուցվածքների փոխնախարարին Վիեննա, Լոնդոն ու Սոչի գործուղելու մասին որոշումներ է ստորագրել։
Մասնավորապես, Ֆինանսների փոխնախարար Արման Պողոսյանը 2022 թվականի նոյեմբերի 28-ից մինչեւ դեկտեմբերի 2-ը կգործուղվի Ավստրիայի Հանրապետություն (Վիեննա)՝ «Ֆինանսական եւ կայունության հաշվետվողականություն՝ հանուն պարտքի թափանցիկության եւ կայուն վերականգնման» խորագրով 2022 թվականի նախարարական համաժողովին նվիրված միջոցառումներին մասնակցելու նպատակով:
Ֆինանսների փոխնախարար Արմեն Հայրապետյանը եւ նախարարության պետական պարտքի կառավարման վարչության գործառնական բաժնի պետ Սամվել Խանվելյանը դեկտեմբերի 6-9-ը կգործուղվեն Մեծ Բրիտանիայի եւ Հյուսիսային Իռլանդիայի Միացյալ Թագավորություն (Լոնդոն)՝ «Clearstream Banking Luxembourg» արժեթղթերի միջազգային պահառուի աջակցությամբ կազմակերպվող մի շարք աշխատանքային քննարկումների մասնակցելու նպատակով:
Վարչապետի մեկ այլ որոշմամբ, Տարածքային կառավարման եւ ենթակառուցվածքների նախարարի տեղակալ Հակոբ Վարդանյանը նոյեմբերի 21-23-ը կգործուղվի Ռուսաստանի Դաշնություն (Սոչի)` «Ատոմէքսպո 2022» միջազգային համաժողովին մասնակցելու նպատակով: