Վրաստանը ՆԱՏՕ-ի շատ արժեքավոր գործընկերն է։ Մենք իսկապես ակտիվացնում ենք մեր համագործակցությունը Վրաստանի հետ։ Այս մասին հայտարարել է դաշինքի գլխավոր քարտուղար Յենս Սթոլեթենբերգը։
Նրա խոսքով՝ հունիսին Մադրիդում ՆԱՏՕ-ի անդամ երկրների ղեկավարների գագաթաժողովից հետո հստակ ազդանշան է ուղարկվել այդ կապակցությամբ, եւ այն հաստատվել է Բուխարեստում արտգործնախարարների հանդիպման ժամանակ: «Եվ դա հստակ ազդանշան էր առ այն, որ մենք պետք է ավելին անենք Վրաստանի հետ միասին։ Մենք ամրապնդեցինք մեր քաղաքական համագործակցությունը, գործնական աջակցությունը։ ՆԱՏՕ-ն, ընդհանուր առմամբ, ավելացրել է իր ներկայությունը Սեւծովյան տարածաշրջանում։ Մենք ունենք երեք անդամ պետություն՝ Թուրքիան, Բուլղարիան եւ Ռումինիան որպես անդամներ, բայց նաեւ Ուկրաինան, եւ Վրաստանը մտերիմ եւ արժեքավոր գործընկերներ են։ Եվ մենք կշարունակենք ավելացնել մեր ջանքերը»,-նշել է նա։
