«Թուրքիան արդեն սկսել է կորցնել Ադրբեջանը, եւ արդեն չի աշխատում „մեկ ազգ, երկու պետություն“ սկզբունքը»,- այսօր հրավիրած քննարկման ժամանակ հայտարարեց Ռազմավարական եւ ազգային հետազոտությությունների հայկական կենտրոնի ղեկավար Ռիչարդ Կիրակոսյանը: Քննարկումը նվիրված էր հայ-թուրքական զարգացումներին, ինչպես նաեւ հոկտեմբերի 27-ի ոճրագործության 10-ամյակին:
Ռ. Կիրակոսյանը հիշեցրեց թուրքական դրոշները Ադրբեջանում հանելու դեպքը՝ ընդգծելով, որ Ադրբեջանը շատ հեռուն է գնացել Թուրքիային վանելու հարցում եւ այդ միտումը շարունակվում է:
«Թուրքիան փորձում է կայունացնել քրդական տարածքները ոչ միայն ռազմական, այլ նաեւ տնտեսական զարգացման ճանապարհով, իսկ դրա համար հայ-թուրքական սահմանի բացումը լրջագույն խթան կարող է լինել»,- ասաց նա՝ հավելելով, սակայն, որ միաժամանակ Թուրքիան կձգձգի արձանագրությունների վավերացումը՝ դրանով փորձելով առավելագույնի հասցնել սահմանը բացելու հարցում իր դերը":
Ըստ Ռ. Կիրակոսյանի, Թուրքիան քաղաքական ու դիվանագիտական աշխատանքին զուգահեռ հանդես է գալիս նաեւ մշակութային նախաձեռնություններով: Մասնավորապես Կարսում Վանում ու Անիում մշակութային միջոցառումներ են իրականացվում, տեսանյութերի ու գրքերի ցուցահանդեսներ են կազմակերպվում, միաժամանակ թուրք գործարարները հետաքրքրություն են ցուցաբերում Հայաստանի նկատմամբ, ինչը նշանակում է, որ սահմանի բացումը շատ իրական է եւ տեղի է ունենալու: Դա է հուշում նաեւ այն, որ, ըստ փորձագետի, Թուրքիայի ԱԳ նախարար Ահմեդ Դավութօղլուն վերջերս իր ելույթներում փորձում է դրական մթնլորտ ստեղծել սահմանի բացման հարցում։
